31 қызметкері бар компания тоғыз қабатты 9 үй салған депутат

- Қазақстанда жыл сайын мемлекеттік органдармен бірге квазимемлекеттік компаниялар, жер қойнауын пайдаланушылар реттелетін сатып алу шараларын ұйымдастырады. Олардың жиынтық көлемі 30 трлн теңгеге дейін жетеді. Алайда шынайы көрініс салмақты сұрақтар туғызады. Мысалы, ресми түрде 31 қызметкері ғана бар бір компания тұрғын үй сатып алу бағдарламасы бойынша 495 пәтерді қолданысқа берген. Бұл тоғыз қабатты тоғыз үй деген сөз. Ал ондай құрылысты кемінде 700 адам салуы мүмкін. Компанияның штаттағы жұмысшыларының саны бұдан 20 есе аз, - дейді депутат.

Оның сөзінше, дәл осындай сәйкессіздіктер бүкіл республика аумағында болып жатыр.

- Мұндай компаниялар мемлекеттік, квазимемлекеттік жобаларға жаппай қатысып, ондаған, тіпті жүздеген миллиард теңгенің мемлекеттік тапсырысына бенефициар болып отыр. Жұмыс күші де, өндіріс қуаты да жоқ болғанына қарамастан, әлеуметтік нысандарды, мектептер мен ауруханаларды, инфрақұрылым мен тұрғын үйді қатар сала береді. Осылайша нақты жұмыстың көбі бейресми тәсілмен, «көлеңкелі жолмен», салық пен әлеуметтік аударымдар төлемейтін гастарбайтерлердің, есепке алынбаған жұмысшылардың күшімен істеледі, - дейді Болатбек Нажметдинұлы.

Мәжіліс депутаты мұндай тенденция мемлекетті қыруар салықтан қағып қана қоймай, елдегі жұмыссыздықты ушықтырып жатыр.

- Бейінді министрліктер сатып алу ережелеріне еңбекақы төлеу қоры мен салық, әлеуметтік аударым бойынша қойылатын ең төменгі міндетті талаптарды енгізу керек. Ірі мемлекеттік инвестициялық жобаларға штат саны өте аз компаниялардың қатысу фактілері бойынша тексеру жүргізу қажет, - делінген депутаттық сауалда.

Еске салсақ, Мәжілістің тағы бір депутаты Азат Перуашев «Самұрық-Қазына» қоры мемлекеттен 1,25 трлн теңге табысын жасырып қалғанын мәлім еткен болатын.