“32 мың төле“ аустралиялық туристің таксимен жол жүруі сотпен аяқталуы мүмкін

Алматы әуежайынан 2 мың теңгеге жолға шыққан аустралиялық турист үшін такси құны 32 мың теңгеге дейін өсіп, соңы бопсалауға ұласқан. Tengri Travel оқиғаның мән-жайын білді.

Бәрі неден басталды?

Бұл жағдай туралы туристі танитын қазақстандық әлеуметтік желіде айтып берді. Оның сөзінше, жүргізуші Бенді әуежайдан алып кетіп, жолақысы 2 мың теңге болатынын алдын ала айтқан. Алайда межелі жерге жеткенде сома кенет 32 мың теңгеге дейін өскен.

"Бұл жүргізуші Аустралиядан келген қонақты (Бенді) әуежайдан 2000 теңгеге келісіп алып кетіп, жеткізген кезде 32 000 теңге сұраған. Бас тартқан жағдайда заттарын бермеймін деп бопсалаған. Бен ақшаны картаға аударуға мәжбүр болған. Сонша мақтанатын қонақжайлылығымыз осы ма?", - делінген жазбада.

Скриншот: Threads

Автордың пікірлер бөлімінде аустралиялық саяхатшы отанына аман-есен оралған нақтылап өтті.

Жазба 120 мыңнан астам қаралым жинады. Желі қолданушыларының пікірі екіге жарылды: бірі такси жүргізушісін жазалау керек десе, енді бірі туристерді алдау - бұл әлемдік тәжірибеде бар жағдай дегенді алға тартады.

"Мұндай жағдайлар өте көп. Әуежай таксистері жиі осылай алдайды. Олар 2000 теңге дейді де, жолдың соңында бұл бір шақырымның құны екенін айтады. Мұнда 16 шақырым - 32 000 теңге төле дейді. Мұндай оқиғалар өте көп". "Кез келген елде туристерді алдап соғады ғой". "Шетелде алдамайтындай айтады екенсіздер, ол жақта да дәл осындай. Басқа елде бәрі керемет деп кім айтты?". "Бізде де ұқсас жағдай Алматы әуежайында болған. Тіл білмейтін, интернеті жоқ, балаларымен жүрген шетелдік қонақтарымыз үшін таксимен жүру 86 000 теңгеге түсті. Таксистер тіпті оларды ақша айырбастау пунктіне апарып, туристердің ақшасы жетпей қалғанда, 6 000 теңге "жомарттықпен" жеңілдік жасаған". Полиция не деді?

Біз жағдайға қатысты пікір алу үшін Түрксіб аудандық полиция басқармасы жанындағы полиция бөліміне хабарластық. Полиция бұл өтініш 2026 жылғы 3 қыркүйекте тіркелгенін хабарлады.

"Алматыдағы такси жүргізушісінің қызмет ақысын асыра көрсетуіне қатысты өтініш 2026 жылғы 3 қыркүйекте Түрксіб аудандық полиция басқармасы жанындағы полиция бөлімінде Ақпаратты есепке алу кітабына тіркелгенін хабарлаймыз. Аталған дерек бойынша 1968 жылы туған А.Т. есімді азаматқа қатысты материалдар жинақталып, Әкімшілік құқық бұзушылық туралы кодекстің 463-бабы 1-бөлігі бойынша хаттама толтырылды және Алматының мамандандырылған ауданаралық әкімшілік сотына жолданды", - деп атап өтті ведомство.

Осылайша, жүргізушінің іс-әрекетіне түпкілікті бағаны сот беруі тиіс.

Егер сот жүргізушіні кінәлі деп таныса, оған айыппұл салынады. Заң бойынша тіркеусіз немесе хабарламасыз жұмыс істегені үшін мынадай айыппұл қарастырылған:

жеке тұлғалар үшін (15 АЕК) - 64 875 теңге; шағын кәсіпкерлік субъектілері үшін (25 АЕК) - 108 125 теңге; орта кәсіпкерлік субъектілері үшін (40 АЕК) - 173 000 теңге.

Бізді Google-дың негізгі дереккөздер тізіміне қосыңыз

Қосу