400 мың емес : Қазақстандағы ең шынайы әрі жиі кездесетін жалақы мөлшері аталды

Ұлттық статистика бюросы Қазақстандағы модальді жалақы мөлшерін жариялап, жылдық деректерді жаңартты. Өткен жылдың есептеріне сәйкес, ол бары-жоғы 116,1 мың теңгені құрады, деп хабарлайды Ranking.kz.

Анықтама: модальді жалақы — бұл барлық жұмыс істейтін азаматтар арасында ең жиі кездесетін еңбекақы мөлшері. Орташа жалақыдан айырмашылығы, ол адамдардың басым бөлігінің қолына тиетін нақты соманы көрсетеді.

Көлемінің шағындығына қарамастан, көрсеткіш алдыңғы кезеңмен салыстырғанда 19 пайызға өскен (бұған дейін ол 97,6 мың теңге болатын). Салыстыру үшін айтсақ: елдегі орташа атаулы жалақы модальді жалақыдан дерлік 3,8 есе жоғары.

Өңірлер арасындағы алшақтық:

Елдегі халықтың нақты кірісі бойынша жағдай әртүрлі. Қазақстанның 20 өңірінің 6-уында ғана ең жиі кездесетін жалақы 200 мың теңгеден асады, ал 11 өңірде ол тіпті 120 мың теңгеге де жетпейді.

Ең көп төлейтін өңірлер: ШҚО (256,9 мың теңге), Астана (252,7 мың теңге) және Алматы (247,4 мың теңге).

Ең аз төлейтін өңірлер: СҚО, Түркістан және БҚО — мұнда бұл көрсеткіш 112–113 мың теңге деңгейінде тоқтап тұр.

Қай салада табыс жоғары және аз:

Салалар бөлінісінде тау-кен өндіру өнеркәсібі көш бастап тұр — ондағы ең жиі кездесетін жалақы 418,3 мың теңгеге жетеді. Көлік және қоймалау саласында бұл көрсеткіш 396,9 мың теңгені, ал энергетикада 377,2 мың теңгені құрайды.

Ең төменгі табыс білім беру саласының қызметкерлерінде тіркелді: олардың ең кең тараған жалақысы бары-жоғы 114,6 мың теңгені құрады, бұл мұнайшылар мен шахтерлардың табысынан 3,5 еседен астам төмен.

Кеше, 16:03