500 га жер пайдаланылмаған:Атырауда ауыл шаруашылығы жері мемлекетке қайтарылды

АСТАНА, 22 тамыз - Sputnik. Атырау облысы бойынша жер ресурстарын басқару департаменті ауыл шаруашылығы тауарын өндірушіге қатысты жоспардан тыс тексеру жүргізді.

Тексеру барысында Қызылқоға ауданында орналасқан, шаруа қожалығын жүргізу үшін берілген жалпы алаңы 500 гектар ауыл шаруашылығы мақсатындағы жер телімінің нысаналы мақсатқа сай пайдаланылмағаны анықталған.

"Заң бұзушылықтарды жою мақсатына жер пайдаланушыға тиісті нұсқама берілді. Алайда нұсқама орындалмағандықтан, аталған департамент Атырау облысының мамандандырылған ауданаралық экономикалық сотына талап арыз берді. Сот талқылауының қорытындысы бойынша департамент талабы толық қанағаттандырылды", - дейді Ауыл шаруашылығы министрлігі.

Нәтижесінде жер телімі мемлекет меншігіне қайтарылды. Ауыл шаруашылығы мақсатындағы пайдаланылмай жатқан немесе нысаналы мақсатқа сай пайдаланылмаған жерлерді анықтау және мемлекет меншігіне қайтару жұмыстары жалғасуда.