7 20 25 : ипотека лимиті өсті

Ұлттық банк «7-20-25» бағдарламасы аясында ипотекалық лимиттің өскенін хабарлады. Демек енді тұрғындар несиенің жеңілдетілген мүмкіндігін сақтай отырып, қымбатырақ баспаналарды сатып ала алады.  Мәселен, Астана, Алматы, Шымкент, Ақтау және Атырау қалаларының лимиті 25 миллионнан 30 миллион теңгеге өсті. Ал Қарағандыда максималды сома бұрынғыдай 20 емес, 25 миллион деп бекітілді. Сондай-ақ өзге өңірлердегі лимит 15 миллионнан 20 миллион теңгеге артты. Мамандар: «Бұл нормаларды ипотекалық тұрғын үй қарыздарының қолжетімділігін арттырып, сатып алу шарттарын оңтайландыру үшін қабылданды», - дейді.

Бауыржан Ысқақ, экономист:

- Қазақстандықтар үшін өте тиімді деп айтуға болады. Себебі тұрғын үй бағасының өсуі, халық табысының төмен қарқыны мен өсу жағадайында мемлекет тарапынан жеңілдетілген несиелердің көбеюі бұл баспана мәселесін шешуге үлкен мүмкіндік береді. Бұл сонымен қатар құрылыс саласының жандануына, халықтың тұрғын үймен қамтылу мүмкіндіктерін арттырады.