7 20 25 : қазақстандықтарға алаяқ делдалдардан сақ болу ескертілді

Қазақстанның орнықтылық қоры азаматтарды «7-20-25» тұрғын үй ипотекалық бағдарламасының айналасында әрекет ететін түрлі делдалдар мен күмәнді тұлғаларға сақтықпен қарауға шақырады.

— Қазіргі таңда бағдарламаға қатысушы банктердің басым бөлігі өтінімдерді қабылдаудың толық онлайн форматына көшті. Бұл ашықтықты қамтамасыз етіп, баршаға бірдей тең қолжетімділік берді және өтінімдерді қарау процесіне араласу мүмкіндігін жойды. Онлайн-кезек автоматты түрде қалыптасады, ал банк қызметкерлері немесе үшінші тұлғалар тарапынан қандай да бір манипуляциялар техникалық тұрғыдан мүмкін емес, — делінген қор хабарламасында.

Қазақстанның орнықтылық қоры өзін ипотекалық брокер, кеңесші немесе делдал ретінде таныстыратын «көмекшілер» тарапынан алаяқтық жағдайларының жиілеп кеткенін хабарлайды.

— «7-20-25» бағдарламасының танымалдылығын пайдалана отырып, олар сыйақыға кезекті «жеделдетуді», орын «брондауды», несиені «мақұлдатуға кепілдік беруді» немесе банктердің лимиттерін «алып беруді» ұсынады. Алайда, бұл жалған қызмет. Себебі Бағдарлама аясында банктердің өтінім қабылдау процесі толық автоматтандырылған және оған сырттан әсер ету мүмкін емес. Банктер де өз құзыреті шеңберінде мұндай құқықбұзушылықтармен күрес жүргізуде. Ешкімге ақша төлемей, өзіңіз ипотекаға өтінім бере аласыз. Бұл тез, тегін және делдалдарсыз жүзеге асады. Күмәнді делдалдармен байланысқа түспеуді және оларға ақша бермеуді өтінеміз, — делінген хабарламада.

Құрылыс компанияларының сату бөліміндегі жағдайларға да ерекше назар аудару керек екенін ескертті.

— Егер сату менеджерлері сыйақы сұрап, пәтер таңдауға немесе ипотека рәсімдеуге көмек ұсынса, көп жағдайда компания басшылығы өз қызметкерлерінің мұндай алаяқтық әрекеттерінен хабарсыз болып келеді. Мұндай жағдайларда тікелей құрылыс компаниясының басшылығына шағымдануға болады.

Егер сізге Қазақстанның орнықтылық қоры атынан мессенджерлерде, соның ішінде WhatsApp арқылы хабарлама келсе, ондағы сілтемелерге өтпеңіз. Хабарламаны жойып, жіберушіні бұғаттау ұсынылады. Алаяқтар зиянды сілтемелер немесе файлдар жіберуі мүмкін, бұл құрылғының бұзылуына және жеке деректердің таралуына әкелуі ықтимал. Қор қызметкерлері жеке тұлғалармен мессенджерлер арқылы байланыспайды.

Қор банктермен алаяқтық пен сыбайлас жемқорлық тәуекелдерінің алдын алу мәселелері бойынша тұрақты түрде өзара іс-қимыл жүргізеді. Егер сіз осындай фактілерге тап болсаңыз, дереу құқық қорғау органдарына жүгінуіңізді сұраймыз. Барлық сұрақ бойынша Қазақстанның орнықтылық қорына хабарласа аласыздар: +7 (727-27) 7-20-25, — делінген хабарламада.

Айта кетелік исламдық ипотека биыл іске қосылуы мүмкін.