7 жылда 500 миллион шығарған : банк қызметкері қайтыс болған адамдардың атына несие рәсімдеген

Воронеждегі ірі банктің бұрынғы қызметкері 2014-2021 жылдары қайтыс болған азаматтардың дерегін пайдаланып, олардың атына несие рәсімдеп келгені әшкереленді, – деп хабарлайды Aikyn.kz сайты.

Тергеу мәліметіне сай, ол 7 жыл ішінде 2600-ден астам қайтыс болған адамдардың атына 200-500 мың рубльден несие ашып, барлығы 500 миллион рубльге жуық қаражатты иемденген.

Схема банктің тұтынушы қайтыс болғаны туралы деректі бірден ала алмайтынын пайдалану арқылы іске асқан. Күдікті "ЗАГС" дерекқорына қызметтік қолжетімділігін қолдана отырып, марқұмдардың жеке мәліметін тапқан, несиелерді рәсімдеп, қаржыны өзіне етене таныс шоттар арқылы шығарып отырған. Ал банк тарапынан марқұмның қарыздары «үмітсіз берешек» ретінде есептен шығарылып, рәсімдеу тетігі тексерілмеген.

Іс 2021 жылы кездейсоқ ашылды. Мұрагерлік рәсімдеуге келген азамат әкесінің (3 жыл бұрын қайтыс болған) атына 400 мың рубль несие «ілініп» тұрғанын білген. Банк ішкі тексеріс өткізіп, марқұмнан кейін екі ай өткен соң рәсімделген несиені және осыған ұқсас ондаған жағдайды анықтады. Барлық жолдар бір маманға, яғни Маринаға апарған.

Күдікті 2021 жылдың қазанында тергеуге шақырылып, қылмыс жасағанын мойындады. Сөйтіп ол бұл сема, шоттар, сатып алынған мүлік туралы толық мәлімет берген. 2022 жылы сот оны аса ірі көлемдегі алаяқтық бабы бойынша айыпты деп танып, 9 жыл жалпы режимдегі колонияға қамау және мүлікті толық тәркілеу жазасын тағайындады. Бес пәтер, екі автомобиль және Мәскеу маңындағы саяжайы мемлекет меншігіне өтті. Балаларына әжесі қамқорлық жасайды. Банк марқұмдардың отбасына өтемақы төлегенін хабарлады.

Сотталған әйел жазасының екі жылын өтеп, 2024 жылы шартты түрде мерзімінен бұрын босатылған. Іс банктердің тұтынушы дерегін қорғау және ішкі комплаенс рәсімдерін күшейту қажеттігін күн тәртібіне қайыра шығарды.