8 миллиард теңге шығын және 33 сотқа дейінгі тергеп тексеру: автомобиль жолдары саласындағы тексерістер не анықтады

Бас прокурордың бірінші орынбасары Жандос Өміралиев Үкіметтегі кеңесте автожол саласындағы тексерулердің алдын ала нәтижелерін баяндады, деп хабарлайды Tengri Auto.

Өміралиевтің мәліметінше, жоспарлау мен құрылыстан бастап жолдарды пайдалануға дейінгі барлық кезеңде жүйелі бұзушылықтар анықталды. Бүгінгі таңда 33 сотқа дейінгі тергеу амалдары басталды. Залалдың алдын ала сомасы 8 миллиард теңгеден аса деп бағаланып отыр, тергеу жұмыстары жалғасып жатыр.

Сонымен қатар негізсіз келісімшарттар мен мемлекеттік сатып алу жоспарларының күшін жою есебінен 36 миллиард теңге сомасындағы шығындардың алды алынды. Атап айтқанда, прокуратура мәліметінше, бұрын жөнделген жолдарды, соның ішінде мердігерлердің қолданыстағы кепілдік міндеттемелері бар нысандарды жөндеуге жаңа тендерлер жариялау фактілері анықталды.

Автожол саласын реформалау жөніндегі кеңесті премьер-министр Олжас Бектенов өткізді. Жиында жол төсеміндегі жарықтардың, шұңқырлардың және басқа да ақаулардың пайда болу себептері, сондай-ақ өңірлердің климаттық жағдайлары мен нақты жүктемелерді ескере отырып, нормативтерді жаңарту бойынша ұсыныстар талқыланды.

Кеңес қорытындысы бойынша премьер-министр Автожол саласын реформалау жөніндегі жұмыс тобына осы жылдың қараша айының соңына дейін талқылауды аяқтап, ұсыныстардың кешенді пакетін дайындауды тапсырды. Қорытынды құжат жол төсемінің мерзімінен бұрын бұзылу себептерін жою және мердігерлік ұйымдардың жұмыс сапасы үшін жауапкершілігін арттыру шараларын қарастыруы тиіс.

Тағы оқыңыз: Астанада бірнеше жол ашылады: әкім нақты мерзімін атады

Бізді Google-дың негізгі дереккөздер тізіміне қосыңыз