8,9 млн гектарға ауыл шаруашылығы дақылдары егілді

Қазақстан аумағында көктемгі егіс науқаны қарқынды жүріп жатыр. Облыс әкімдіктерінің жедел деректеріне сәйкес, бүгінге дейін ауыл шаруашылығы дақылдары жалпы 8,9 млн гектар алқапқа егілген.

Егіс құрылымында негізгі үлесті дәнді және майлы дақылдар алып отыр. Атап айтқанда, дәнді дақылдар 5,5 млн гектарға, майлы дақылдар 2,3 млн гектарға егілген. Сонымен қатар мал азықтық дақылдар 642 мың гектарды, мақта 166 мың гектарды, көкөніс 102 мың гектарды, бақша өнімдері 77 мың гектарды, картоп 93 мың гектарды, ал қант қызылшасы 22 мың гектарды қамтыды.

Өңірлер бойынша егіс жұмыстарының қарқыны әртүрлі. Солтүстік астықты аймақтарда науқан белсенді кезеңде жалғасуда. Ақмола облысында 2 млн гектарға жуық жер игерілсе, Қостанай облысы мен Солтүстік Қазақстан облысы-нда 1,3 млн гектардан астам алқапқа егін егілген.

Ал оңтүстік және оңтүстік-шығыс өңірлерде егіс науқаны аяқталуға жақын. Жамбыл облысы-нда жұмыстардың 98,1%-ы, Жетісу облысында 97,5%-ы орындалған. Алматы облысында да егіс 96,1% деңгейінде аяқталуға жақын.

Министрлік дерегінше, егіс жұмыстарына 133,9 мың трактор, 5,6 мыңнан астам жоғары өнімді егіс кешені, 71,4 мың сепкіш және 188,5 мың топырақ өңдеу құралы жұмылдырылған. Техникалық қызмет көрсетуді 70 сервистік орталық қамтамасыз етіп отыр.

Сонымен қатар тыңайтқышпен қамтамасыз ету мәселесіне де ерекше назар аударылған. 2026 жылға жоспарланған минералды тыңайтқыш көлемі 2,3 млн тоннаны құрайды. Қазіргі таңда оның 1,4 млн тоннасына келісімшарт жасалып, 1,2 млн тоннасы жеткізілген.

Аграрлық секторды қолдау үшін жергілікті бюджеттер есебінен тыңайтқыш құнын субсидиялауға 56,3 млрд теңге қарастырылған.