Абай облысында 25 әлеуметтік нысан салынады

Семейде арнаулы әлеуметтік қызмет көрсету орталығының қосымша ғимараты қолданысқа берілді.

Нысан мемлекетке қайтарылған қаражат есебінен салынды. Орталық стационарлық жағдайда 18 жастан асқан психоневрологиялық ауытқуы барларға, бірінші және екінші топтағы мүгедектігі бар жандарға қызмет көрсетеді. Бұған дейін мекемеде 100-ден аса адам кезекте тұрған. Мамандардың айтуынша, жаңа ғимарат бұл мәселені шешуге мүмкіндік береді. Сондай-ақ медициналық және әлеуметтік қызмет көрсету сапасын арттыруға жол ашады. Жалпы Абай облысы бойынша мемлекетке қайтарылған активтер есебінен 22 миллиард теңгеге 25 әлеуметтік нысан салу жоспарланған. Қазір оның үшеуі пайдалануға берілді.

Мейіржан Қалиасқаров, облыстық прокуратураның басқарма басшысы:

- Біз үйлестіру кеңесін өткізіп тиісті тексеру жұмыстарын жүргізу нәтижесінде, мысалы, 300 орындық мекемеде 400 ден астам науқастың емделіп жатқанын біз өзіміз анықтап, сондықтан бас прокуратураға әкімдікпен бірлесіп, хат жолдап соның нәтижесінде мемлекетке қайтарылған активтер есебінен 2,6 миллиард теңге бөлініп, бір жылдың ішінде заманауи ғимарат пайдалануға берілді.