Алматы облысында 1300 ден астам нысан әлеуметтік бейімдеуден өтеді

Алматы облысының 1300-ден аса нысаны әлеуметтік бейімдеуден өтеді.

Еңбек және халықты әлеуметтік қорғау министрі Светлана Жақыпова өңірге жасаған жұмыс сапарында осылай деді. Бұл ретте мемлекеттік қолдау шараларының тиімділігі мен цифрлық шешімдердің енгізілуі маңызды екені айтылды.

Алматы облысында бейімдеуге жататын 1300-ден астам нысан анықталды. Ақпарат интерактивті қолжетімділік картасына енгізілген. Қазір өңірде 919 нысан бейімделсе, толық инклюзивті қолжетімділікті қамтамасыз ету 2028 жылға дейін жоспарланған.

Қайрат Әзірбай, Қонаев қаласының тұрғыны:

- Біздің қаламызда осы уақытқа дейін пандус, тактильные плитки, мүгедектік тұрақтар өте слабый болған. Бірақ қазіргі таңда Аллаға шүкір, қызмет өте жақсы деңгейде атқарылып жатыр. Мүгедектік тұрақтар қойып жатыр. Саябаққа кіре алмайтынбыз, пандусын жасап берді. 

Министр облыс активімен кездесуде әлеуметтік саясатты іске асырудағы цифрлық құралдарды таныстырды. Мемлекеттік қолдаудың ашықтығын қамтамасыз ету үшін бірыңғай ақпараттық жүйе енгізілген. Ел бойынша әлеуметтік көмек 53 мың отбасыға, оның ішінде Алматы облысында 3,5 мың отбасыға тағайындалған. Сонымен қатар жаңа жүйелердің нақты нәтижелері де айтылды.

Светлана Жақыпова, ҚР Еңбек және халықты әлеуметтік қорғау министрі:

- Талғар ауданында Ақжол М деген орталық бар. Ол орталықта Қазақстан халқына фондымен бірігіп, біз пилоттық жоба аштық. Пилоттық жобада қазір қарасақ, бір жылдың ішінде 40 бала, жүре алмаған, тұра алмаған, отыра алмаған балалар бір тәй-тәй деп бір қадамын жасап жүріп кетті. Сол балалардың тұсауын кестік. Сол нәтиже деймін. 

Кездесу барысында тұрғындар әлеуметтік мәселелер бойынша өз ұсыныстарын білдірді.

Гүлім Советқан, Аят Дуйсембай, Аманжол Жонкешов