Абай облысында ақылды камералар көбейді

24.KZ дереккөзінен алынған мәліметтерге сүйене отырып, Qazaq24.com түсініктеме жасады..

Абай облысында адамның бет-бейнесін танитын камералар орнатылып жатыр.

Іздеуде жүрген немесе хабар-ошарсыз кеткендерді ақылды жүйе арқылы анықтауға болады, дейді мамандар. Семейде қазір екі мыңға жуық бейнебақылау камерасы жұмыс істеп тұр. Оның 84-і бейнеаналитика жүйесімен жабдықталған. Басты мақсат қоғамдық қауіпсіздікті күшейту және құқық бұзушылықтың алдын алу.

Рүстем Қайратұлы, тілші:

- Бейнеалитика жүйесі орнатылған камералар Семейдегі автовокзалдар мен халық көп жиылатын орындарға қойылған. Бет-әлпетті осылай сканерлеу арқылы іздеуде жүрген немесе хабар ошарсыз кеткен адамдарды анықтауға болады. Ол үшін жедел басқару орталығында арнайы команда жұмыс істейді.

Қаладағы барлық камера осы орталыққа қосылған. Мұндағы мамандар құрылғының көмегімен құқық бұзушылықты жедел анықтап, алдын-алады. Бет-әлпетті анықтайтын ақылды камераларды арнайы оператор бақылап отырады.

Дина Темірбаева, облыстық ПД жедел басқару орталығының аға инспекторы:

- Жүйе тек қана қолданыстағы заңнама аясында пайдаланылады және азаматтарды жаппай бақылауға арналмаған. Оны қолдану құқықтық тәртіпті қамтамасыз ету және адамдардың өмірі мен денсаулығын қорғау міндеттерімен шектеледі. Зияткерлік камераларды пайдалану полиция қызметкерінің жұмысын алмастырмайтынын, керісінше қызметкерлерге өздерінің қызметтік міндеттерін барынша дәл және жедел орындауға көмектесетін қосымша құрал болып табылатынын атап өту маңызды.

Бүгінге дейін камералардың көмегімен 64 қылмыс ашылып,11 мыңнан астам әкімшілік құқық бұзушылық анықталды. Алдағы уақытта бейнеаналитика жүйесі бар құрылғыларды өңірдегі барлық уақытша ұстау изоляторына орнату жоспарланып отыр.

- Керек деп ойлаймын. Неге десең халық көп қой. Тәртіпті жақсартқанға, адамдар бір-бірін тауып алғанға ондай жағдайлар көп кезігеді.

- Біз автовокзалда қандай адам жүргенін білмейміз. Олардың арасында іздеуде жүрген қылмыскерлер де болуы мүмкін. Сондықтан ақылды камералардың орнатылуы өте орынды деп есептеймін. Менің ойымша бұл дұрыс әрі қажет шешім.

Тәртіп сақшылары ақылды камералар жоғалған жандарды тауып, іздеуде жүргендерді анықтауға септігін тигізетінін айтады. Қазір Абай облысында 52 қылмыскер іздеуде жүр. 62 адам хабар ошарсыз кеткен.

Рүстем Қайратұлы, Медет Өмірханов

Соңғы жаңалықтар мен жаңартуларды жіберіп алмау үшін Qazaq24.com сайтынан бақылауды жалғастырыңыз, біз жағдайды қадағалап, ең өзекті ақпаратты ұсынамыз.