Абай облысына қоныс аударушылар көбейді

Биыл Абай облысына көші-қон бағдарламасымен 198 қандас және өзге өңірлерден 221 адам қоныс аударды, деп хабарлайды 24KZ. Мамандардың айтуы бойынша, өткен жылдармен салыстырғанда көшіп келушілер саны айтарлықтай артқан. Көбі тұрақты жұмысқа орналасып, баспаналы болды. Өз кәсібін ашқандар да бар.

7 жыл бұрын Моңғолиядан атамекенге қоныс аударған Заманбек Сезейұлы  Қарауыл ауылының маңындағы қыстақта тұрады. Жылқы баптап, тазы үйретіп, жас ұрпаққа қазақтың салт-дәстүрін дәріптеп жүр. Елге алғаш келген кезде мемлекет тарапынан баспанамен қамтылып, бірреттік төлем алған. Қазір отбасы өз шаруашылығын дамытып отыр.

Заманбек Сезейұлы, Абай ауданының тұрғыны:

- Сүт, құрт, май, жаз айларында бие сауамыз. Солай тірлік етіп жатқан жағдайымыз бар. Атадан қалған аманатымыз. Осы төрт-түлігіміздің құны да қазір керемет болып жатыр. Бала-шағамыз оқысын, білім алсын, мықты азамат болсын, еліне елеулі, халқына қалаулы азаматтар болсын деп осы Қазақстанға көшіп келіп отырмыз.

Қоныс аударушылардың арасында кәсіп ашып, ісін жолға қойғандар бар. Астанадан Кеңгірбай би ауылына қоныс аударған Нұржанат Асқар соның бірі. Мемлекеттік бағдарлама арқылы баспана алып, қазір отбасылық кәсіп ашқан. «Ауылға көшудегі басты мақсат – балаларымның болашағы», – дейді.

Нұржанат Асқар, Кеңгірбай би ауылының тұрғыны:

- Өз кәсібімізді бастау үшін және балаларымызды қазақ тілге үйрету үшін көшіп келдік. Менің ортаншы балам қазақша мүлде түсінбейтін. Сондықтан біз Абайдың еліне көшіп келдік. Бір жыл өтті. Нәтижесі бар, қазір балаларым таза қазақ тілінде сөйлейді. Балалар тез үйреніп кетті. Өйткені мұнда адамдар жайлы, туысыңдай араласады.

Мамандардың айтуынша, биыл атажұртқа көшіп келуге ниет білдіргендердің қатары артқан. Қазіргі таңда 80-ге жуық қандасымыз құжат дайындап жатыр.

Айман Нұрлыбек, облыстық Жұмыспен қамту және әлеуметтік бағдарламаларды үйлестіру басқармасының басшысы:

- Мемлекет тарапынан субсидиялар бөлінеді. Оның ішінде ерікті қоныс аударған отбасының әр мүшесіне 70 АЕК субсидия. Сонымен қатар Абай облысына келгенде үйді жалдап тұрса, бір жылға дейін 15 АЕК-тен 30 АЕК дейін жалдауға қаражат төленеді. Сонымен қатар үй сатып алудың 50%-ін өтейтін «Еңбек ұтқырлығы» сертификаты бар. Оның ең биік мөлшері 1160 АЕК. Осы қаражат шеңберінде үй сатып алу мүмкіндіктері бар.

Мемлекеттік қолдау мен жергілікті халықтың ықыласы қоныс аударушылардың жаңа өмірге бейімделуін жеңілдетеді. Атамекенге оралған қандастар мен елдің түкпір-түкпірінен келген отбасылар жаңа өмір бастап, өңірдің дамуына үлес қосып жүр.

Авторлары: Рүстем Қайратұлы, Медет Өмірханов