Қостанай облысында қоныс аударушылар баспана алу кезінде алаяқтық жасағаны анықталды

АСТАНА, 24 маусым – Sputnik. Қостанай облысының Қарабалық ауданында қоныс аударушылардың тұрғын үй сатып алу үшін заңға қайшы әрекеттерге барғаны анықталды, деп хабарлады бас прокуратура.

Айта кетері, қолданыстағы заңнамаға сәйкес қоныс аударушыларға келу өңіріндегі тұрақты тұратын елді мекендерде тұрғын үй сатып алу кезінде 1 625 айлық есептік көрсеткіш мөлшерінде экономикалық мобильділік сертификаты ұсынылады.

Сонымен қатар, жекелеген тұлғалар аталған мемлекеттік қолдау тетігін заңсыз мақсаттарда пайдаланғаны анықталды. Мәселен, 2024 жылы бір қоныс аударушы жалған сатып алу-сату шартын жасау арқылы 6 миллион теңгеге пәтер сатып алды, оның 3 миллион теңгесі бюджеттік қаражат есебінен қаржыландыруға жатады.

"Тексеру барысында пәтер сатушысы нақты 1,6 миллион теңге алғаны, ал шарттағы тұрғын үй құны сатып алушының өтініші бойынша жасанды түрде көтерілгені анықталды. Сол сияқты, басқа қоныс аударушы экономикалық мобильділік сертификаты бойынша 2,67 миллион теңге алып, құны 5,5 миллион теңгеге көтерілген пәтер сатып алды", - делінген хабарламада.

Алаяқтық фактілері бойынша Қарабалық аудандық прокуратурасы 2 қылмыстық іс қозғады, сотқа дейінгі тергеп-тексеру барысында қоныс аударушылар кінәсін мойындап, мемлекетке келтірілген жалпы сомасы 5,7 миллион теңге шығынды толық көлемде өтеді. Осыған байланысты қылмыстық істер бойынша іс жүргізу ақталмайтын негіздер бойынша тоқтатылды.