Қостанай облысында SIM жабдықты пайдалану арқылы интернет алаяқтық схемасы анықталды

«Антифрауд» республикалық жедел-алдын алу іс-шарасы аясында Қостанай облысы Полиция департаментінің киберқылмысқа қарсы іс-қимыл басқармасы қызметкерлері Қостанай қаласы ПБ киберқылмысқа қарсы бөлімшесімен бірлесіп, «Кселл» АҚ және «Қазақтелеком» АҚ ұялы байланыс операторларымен өзара іс-қимыл жасай отырып, сондай-ақ облыстық прокуратураның үйлестіруімен SIM-box жабдығын пайдалану фактісін анықтады, – деп хабарлайды Aikyn.kz.

Жедел іс-шаралар нәтижесінде интернет-алаяқтар үшін техникалық торап ұйымдастырды деген күдікпен Рудный қаласының 22 жастағы тұрғыны ұсталды.

Полицияның мәліметінше, күдікті бір мезгілде әртүрлі байланыс операторларының көптеген SIM-карталарымен жұмыс істеуге мүмкіндік беретін SIM-box құрылғысын пайдаланған. Мұндай жабдық телефон нөмірлерін алмастыруға және интернет арқылы алаяқтық қоңыраулар шалуға, қазақстандық нөмірлерден қоңырау шалынғандай көрініс жасауға қолданылады.

Тұрғылықты жерін тексеру барысында ұялы телефондар, SIM-карталар, интернет-роутер, сондай-ақ бейнебақылау жүйесі тәркіленді. Аталған жабдық интернет-сервистер арқылы келіп түсетін қоңырауларды қабылдау және өңдеу үшін пайдаланылғаны анықталды.

Алдын ала мәліметтер бойынша, ұсталған азамат мессенджерлер арқылы заңсыз схеманы ұйымдастырған белгісіз тұлғалардың нұсқауларын орындаған және олардың әрекеттерін үйлестіріп отырған.

Қазіргі уақытта полиция қызметкерлері қылмыстық схеманың ұйымдастырушылары мен басқа да қатысушыларын анықтау және ұстау мақсатында жедел-тергеу іс-шараларын жүргізуде.

Күдікті ұсталып, уақытша ұстау изоляторына қамалды. Оған қатысты бұлтартпау шарасын таңдау мәселесі қаралуда. Тергеу амалдары жүргізіліп, оқиғаның барлық мән-жайы және басқа тұлғалардың қатысы анықталуда.

Полиция департаменті интернет-алаяқтықты анықтау және жолын кесу жұмыстары жалғасатынын, мұндай схемалардың ұйымдастырушылары мен қатысушылары заңға сәйкес жауапкершілікке тартылатынын атап өтті.