Адамдыққа жат контентті шектеу орынды іс: Бейсенбаев ЛГБТ насихатына тыйым салу заңы туралы айтты

Мәжіліс депутаты, «AMANAT» партиясы фракциясының жетекшісі Елнұр Бейсенбаев қоғамда балалар мен жасөспірімдерді цифрлық кеңістіктегі теріс контенттен қорғау мәселесіне байланысты заң жобасын қолдады, Депутат педофилияны және дәстүрге жат бағытты насихаттауға тыйым салатын түзетулер енгізілгенін жеткізді, деп хабарлайды Aikyn.kz сайты Аzattyq-ruhy.kz сілтеме жасап.

«Біз балалар мен жасөспірімдердің интернетте күн сайын отбасы, адамгершілік және болашақ туралы түсініктеріне теріс әсер етуі мүмкін ақпаратқа тап болатынын көріп отырмыз. Өсіп келе жатқан ұрпақтың санасын құқыққа қарсы контенттен қорғау олардың қауіпсіздігі мен психикалық денсаулығының кепілі. Бұл тақырып Парламент Мәжілісінің депутаттары тарапынан бірнеше рет көтерілген болатын. Мәжілісмендер Еділ Жаңбыршин, Ринат Зайыт, Самат Мұсабаев және Ардақ Назаров ЛГБТ насихатына тыйым салу жөніндегі депутаттық сауалдарын ашық түрде мәлімдеген», - дейді Елнұр Бейсенбаев.

Депутат атағандай, былтыр «Біз Қазақстанда ашық және жасырын ЛГБТ насихатына қарсымыз!» атты петиция ресми қарауға қажетті 50 мыңнан астам қол жинаған болатын.

«Петиция қорытындысы бойынша Ұлттық өркендеуге жәрдем қоры кең ауқымды зерттеу жүргізіп, дәстүрден тыс қатынастарды заңдастыру мен насихаттау өсіп келе жатқан ұрпақтың санасында тұрақтылық пен айқындық сезімін бұзуы мүмкін деген қорытынды жасаған. Осыған байланысты 18 депутаттан тұратын бастамашыл топ педофилияны және дәстүрден тыс бағытты насихаттайтын ақпараттың таралуын шектеуге бағытталған түзетулер енгізуді ұсынды»,- дейді депутат.

Елнұр Бейсенбаевтың айтуынша, ұсынылған түзетулер тоғыз негізгі заңға қатысты: бала құқықтары туралы, жарнама туралы, байланыс туралы, мәдениет туралы, білім туралы, кинематография және бұқаралық ақпарат құралдары туралы заңдарға өзгерістер енгізіледі.

"Жоғарыда айтылғандай, заң жобасындағы маңызды нормалардың бірі – өскелең ұрпақты жағымсыз ақпараттардан қорғау, жат ағымдардан сақтау. Өйткені бала – біздің болашағымыз, еліміздің ертеңі. Сондықтан олардың санасын улайтын, өміріне теріс әсер ететін зиянды ақпараттардан қорғау – ортақ міндетіміз.  Әрине, цифрлық заманда ақпараттарға толықтай тосқауыл қою мүмкін емес. Дегенмен, заңға қайшы, адамдыққа жат контентті шектеу – орынды іс.  Өйткені әлі бұғанасы қатпаған, ақыл тоқтатпаған жасөспірімдердің түрлі ақпаратты талғаусыз қабылдап, солардың жетегінде кетіп қалуы әбден мүмкін. Ондай оқиғалар аз емес. Сондықтан ұсынылып отырған заң осының алдын алуды, келеңсіздіктерге жол бермеуді көздейді.   Осының бәрін ескере отырып, сіздерден заң жобасын екінші оқылымда қабылдауды және Сенаттың қарауына жіберуді сұраймын", - деді Елнұр Бейсенбаев.

Айта кетерлігі, Қазақстан бұл бағытта алғашқы ел емес. Ұқсас заңдар Венгрия, Болгария, Литва, Польша, Қырғызстан және Ресейде де қолданыста бар. Бұдан бөлек, АҚШ-тың Жоғарғы соты президент Дональд Трамптың трансгендерлерге паспортта биологиялық жынысынан өзгеше жынысты көрсетуге тыйым салу жөніндегі ұстанымын қолдаған болатын. Бұл факт төзімділік қағидаттарын ұстанатын АҚШ-тың өзі табиғат заңдылығына қарсы келмейтінін көрсетеді», - дейді ол.

Депутат атағандай, балалардың құқықтарына қатысты халықаралық стандарттар да осыған ұқсас талаптарды қамтиды.

«БҰҰ-ның Бала құқықтары туралы конвенциясының 17-бабы мемлекеттерге балаларды олардың әл-ауқатына зиян келтіретін ақпарат пен материалдардан, соның ішінде интернеттегі мазмұннан қорғау шараларын қабылдауды міндеттейді. Маңыздысы – әңгіме белгілі бір адамдарға тыйым салу немесе оларды жоққа шығару туралы емес. ЛГБТ қауымдастығына жататын азаматтардың жеке құқықтары шектелмейді. Енгізіліп жатқан нормалар тек мұндай ақпараттың жария түрде таралу шеңберін реттейді, бұл халықаралық тәжірибеге толық сәйкес келеді», - деп түйіндеді ол.