Аграрлық салада серпіліс: инвестиция 790 млрд теңгеге жетті

Қазақстанның аграрлық секторына биыл құйылған инвестиция көлемі 790 млрд теңгеге жетті.
Бұл өткен жылмен салыстырғанда 20% өсім. Соңғы үш жылда саладағы еңбек өнімділігі 37,3% артқан. Бұл туралы Президенттің көмекшісі – Баспасөз хатшысы Руслан Желдібай хабарлады.

Мемлекет басшысы ауыл шаруашылығын дамыту бойынша мал шаруашылығы, жерді тиімді пайдалану, су ресурстарын басқару, ирригацияны жаңғырту және саланы цифрландыру сияқты негізгі бағыттарды айқындаған. Биыл алғаш рет жеңілдетілген несие көлемі 1 трлн теңгеден асып отыр.

Қазіргі уақытта ауылшаруашылық техникаларына сұраныстың 90%-ын отандық өндіріс өтейді. Қазақстанда 10 зауыт әлемдік брендтердің 19 түрлі техникасын құрастырады. Агроөнімдер 70 елге экспортталып, құны 5 млрд доллардан асады.