Аида Балаева: Білім саласын дамыту еліміздің жарқын болашағына жасалған маңызды инвестиция

Аида Балаева енді міндетті білім беру тек орта біліммен шектелмей, бастауыш білім де міндетті саналады, - деп жазды әлеуметтік желідегі жазбасында, – деп хабарлайды Aikyn.kz.

Кеше мен жаңа Конституция жобасында мемлекетіміздің зайырлы сипаты нақты бекітілгенін атап өткен едім. Бүгін білім беру мәселесіне тоқталғым келеді. Ата заңда Қазақстандағы білім беру және тәрбие жүйесінің де зайырлы сипатта екені жан-жақты айқындалған.

Қазіргі Конституцияның отызыншы бабында орта білімнің тегін әрі міндетті екені, мемлекеттік жоғары оқу орындарында конкурстық негізде жоғары білім алу құқығы кепілдендірілгені және барлық оқу орындары үшін бірыңғай жалпыға міндетті стандарттар белгіленетіні айқын жазылған.

Ал жаңа Конституция жобасында бұл кепілдіктер толық сақталған. Оның үстіне, норма кеңейтілді. Енді міндетті білім беру тек орта біліммен шектелмей, бастауыш білім де міндетті саналады. Осылайша, мемлекет әрбір баланың білім алуының алғашқы сатыларынан бастап базалық білім деңгейіне жауапкершілікті арттырып отыр. 

Сонымен қатар зайырлы білім беру қағидатын бекіту – дінге қарсы бағытталмағанын дұрыс түсіну маңызды. Ешкімнің сенім бостандығына шектеу қойылмайды. Әрбір кәмелетке толған азамат өз діни көзқарасын еркін таңдап, ұстануға құқылы. Бұл ар-ождан бостандығы туралы конституциялық нормалармен кепілдендірілген. Ең маңыздысы, мемлекеттік білім беру жүйесі діни ұстанымына, дүниетанымына немесе отбасы сеніміне қарамастан, баршаға ортақ, тең және бейтарап болып қала береді.

Осы ретте, жаңа Конституция жобасының Преамбуласында ғылым, білім, мәдениет және инновациялар мемлекеттің ең жоғары басымдықтары қатарына жатқызылғанын айрықша атап өткім келеді. Ұлттың білім деңгейі – елдің стратегиялық дамуының негізгі өзегі. Экономиканың бәсекеге қабілеттілігі, болашақ мамандардың кәсіби деңгейі мен мемлекеттің тұрақты дамуы мектеп пен жоғары оқу орындарындағы білім сапасына тікелей байланысты.

Осылайша, жаңа Конституция жобасы қолданыстағы кепілдіктерді жай ғана сақтап қоймай, оларды одан әрі нығайта түседі. Білім саласын дамыту – еліміздің жарқын болашағына жасалған маңызды инвестиция екені сөзсіз, - деді министр.

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.