Айыппұлдар қорытпайды, камералар құтқармайды. ІІМ генералы жүйткіген жүргізушілерге қарсы түбегейлі шаралар ұсынды

Сенат депутаты, отставкадағы полиция генерал-лейтенанты Марат Қожаев жылдамдық режимін және өзге де жол жүрісі қағидаларын бұзатын жүргізушілер туралы қатаң пікір білдірді. Ол бұл туралы премьер-министр Олжас Бектеновке жолдаған сауалында айтты, - деп хабарлайды Tengri Auto.

Сенат депутаты, отставкадағы полиция генерал-лейтенанты Марат Қожаев жылдамдық режимін және өзге де жол жүрісі қағидаларын бұзатын жүргізушілер туралы қатаң пікір білдірді. Ол бұл туралы премьер-министр Олжас Бектеновке жолдаған сауалында айтты, - деп хабарлайды Tengri Auto.

Қожаевтың пайымдауынша, адам өліміне әкеп соқтыратын жол-көлік оқиғалары - бұл "адамның өз-өзіне тым сенімді болуының, жол жүрісі қағидалары мен азаматтардың қауіпсіздігіне ашық түрде немқұрайды қарауының салдары".

"Бұл мәселе әсіресе өрескел жүргізу мәнері, жылдамдықты асыру, түнгі жарыстар және жол қауіпсіздігі талаптарын өзге де бұзу жағдайы жиі кездесетін ірі қалаларда өршіп тұр. Былтыр біз депутаттық сауалымызда жол жүрісі қағидаларын жүйелі түрде бұзғаны үшін жауапкершілік шараларын күшейту қажеттігі туралы мәселе көтерген болатынбыз. Сауалға берген жауабында Үкімет депутаттардың ұстанымын қолдап, күнтізбелік жыл ішінде 10 және одан да көп құқық бұзушылық жасаған жүргізушілерді ЖЖҚ білімін тексеруге жіберуді көздейтін түзетулер әзірленіп жатқанын хабарлады", - деп еске салды Марат Қожаев Сенаттың пленарлық отырысында.

Оның айтуынша, жол қозғалысы саласындағы тәжірибе бұдан арғы шараларды қабылдауды талап етеді. Ол жылдамдықты асыруды тіркейтін механизмдерді жетілдіруге шақырып, қазіргі уақытта негізінен нүктелік тіркеу қолданылатынын атап өтті. Бұл ретте жүргізуші тіркеу камерасының алдында жылдамдықты қысқа мерзімге бәсеңдетеді де, кейін бақылау аймағынан шыққан соң оны қайтадан асырады.

"Осылайша, жүргізуші іс жүзінде жол жүрісі қағидаларын сақтауға емес, тіркеу жүйесін айналып өтуге дағдыланады. Ереже бойынша, белгіленген жылдамдық жекелеген нүктеде емес, жолдың тиісті учаскесінің бүкіл бойында сақталуы тиіс. Демек, қолданыстағы тәсіл тиісті профилактикалық нәтиже бермей отыр", - деп есептейді Қожаев.

Депутат Қазақстан трассаларында орташа жылдамдықты бақылау механизмдері енгізілгенін еске салды. Қожаев мұндай тәсілдерді елді мекендерде де енгізетін уақыт келгенін мәлімдеді.

"Мұндай модель жеңілдетуші механизмдерді алып тастауды, соның ішінде айыппұлдарды жеңілдікпен төлеу тәртібінің күшін жоюды, ЖЖҚ білімін қайта тексергенге дейін көлік басқару құқығын шектеуді, қайталап бұзған жағдайда басқару құқығынан ұзақ мерзімге айыруды, қасақана қауіпті әрі өрескел заңбұзушылықтар кезінде әкімшілік қамаққа алуды қолдануды көздеуі тиіс", - деп тізіп өтті Марат Қожаев.

Сонымен қатар, жол ережесін бұзбайтын жүргізушілер үшін депутат ынталандыру жүйесін әзірлеуді ұсынды. Олардың қатарында: міндетті сақтандыру құнын төмендету, сервистік өнімдерді пайдалану кезінде жеңілдіктер беру, сондай-ақ қауіпсіз жүргізудің тұрақты мәдениетін қалыптастыруға бағытталған өзге де ынталандыру формалары бар.

"Жол ережесін жүйелі түрде бұзатын тұлғаларға көлік жүргізуге рұқсат беруді бағалаудың түбегейлі жаңа тәсілін енгізуді қарастыруды ұсынамыз. Бұл тек құқық бұзушылық фактілерін тіркеу емес, жүргізушінің мінез-құлық моделін және оның жол қозғалысына қауіпсіз қатысу қабілетін кешенді бағалау туралы болып отыр", - деп толықтырды сенатор.

Осыған байланысты, оның пікірінше, жүйелі заңбұзушылар үшін қосымша бағалаудың міндетті рәсімдерін енгізу мүмкіндігін пысықтау қажет. Бұған тәуекелшіл және агрессивті мінез-құлыққа бейімділігін анықтауға арналған психологиялық тестілеу, көлік құралдарын басқару қауіпсіздігіне әсер ететін мінез-құлық факторларын бағалау, сондай-ақ халықаралық тәжірибеде қолданылатын өзге де құралдарды пайдалану кіреді.

Следите за нашими новостями в Google News