Әкім сайлауы нәтиже берді: Киікті ауылының тәжірибесі

Осы жылдың қараша айында Астанада Президент Қ.Тоқаевтың әкімдермен өткізген кеңейтілген жиыны жергілікті басқару жүйесіне қатысты маңызды сұрақтарды күн тәртібіне шығарып, оның ішінде ауыл, аудан әкімдерін сайлау бойынша мәселе қозғады. Осы орайда «Әкім сайланған соң не өзгерді?» деген көпшіліктің талқылап жатқан маңызды мәселесіне байланысты, Қарағанды облысына қарайтын Киікті ауылының сайланған әкімі мен оның жұмысы туралы сол жақтың тұрғыны ретінде сөз етсем деймін. 

Шет ауданы Киікті ауылдық округінің қазіргі әкімі – Смағұлов Мерей Қуатбекұлы. Ол 2024 жылдың 25 шілдесінде өткен сайлауда көпшіліктің дауысын жинап, Киікті ауылдық округі әкімінің қызметіне қайта сайланған болатын. Себебі халық астына тағын, қолына сойылын беріп, өзара басшы етіп тағайындаған Мерей мырзаның халық үшін жасап жүрген игі істері жетерлік. Халық сайлаған әкімнің, жергілікті қоғамдастық мүшелерінің алдында жауапкершілігі де зор болады екен. Сол себепті Киікті ауылының тұрғындары жергілікті азаматтар үшін түйткілді болған мәселелерді өзінің жауапкершілігімен дербес шешіп жүрген әкімге риза. Сол ауылдан  кезінде түлеп ұшқан, қазір үлкен қалаларда тұратын ауыл тумалары  болып жуырда, 16 желтоқсан күні Киіктіге барғанымызда, ауылдың көркейіп, өркендеп жатқанын өз көзімізбен көріп, қуанып қайттық. 

Атап айтар болсақ, Киікті кентінде жас ұрпаққа білім мен тәрбие беретін негізгі орын – екі қабатты жаңа мектеп бой көтерген. Осы сәулетті құрылыста заманауи балабақша да орналасқан. Сонымен қатар, ауылдың тұрғындары науқастанып қалғанда, келіп-кетіп емделетін және үйден дәрігерлік көмек көрсететін амбулатория салынып, іске қосылыпты. Жас өрендерге арналған спорттық алаң жасақталғанын көрдік, оның өзі ауылдағы оқушылардың тәрбиесі мен денсаулығына зор ықпал ететін қадам.  

Сондай-ақ Киікті - Ақшағыл арасында қатынайтын тас жол салынған: бұрын қар ерігенде,  ол жолмен мал түгіл көлік өте алмайтын. Ауыл әкімінің атқарған жұмысы мұнымен бітпеген: теміржол астынан тасқын су ағызатын көпір қалпына келтіріліп, ауыл ішіндегі жолдар мен көпірлер жөнделген. 

Сонымен қатар, ауыл жанашырларының қаржылық көмегімен салынған сәулетті мешіттің құрылысы ойдағыдай аяқталып, бүгінде ауылымыздың сәнін келтіріп тұр. Осы жылы Жеңістің 80 жылдығы аясында, ауыл тумалары мен жергілікті тұрғындардың қолдауымен, Киіктіде 1941-1945 жылдары Отан үшін отқа түскен, отбасына оралмаған жауынгерлер және тылда аянбай еңбек еткен ауылдастардың тізімі, бес гранит тасқа қашалған “Жеңіс алаңы” салынып, салтанатты түрде ашылған еді. Осы кішкентай ғана ауылымызда жасалып жатқан барлық істің бір парасы ғана, бұл. 

Тұрғындардың ой-пікірін тыңдап, бәрін ұйымдастырып, басшылық етіп жүрген, халқы сайлаған әкім Мерей Қуатбекұлы өзіне жүктелген міндеттерді абыроймен атқарып келеді. Ол ауыл маңындағы  тарихи және мәдени мұраны сақтауды да қаперден шығарған емес.  Мәселен, Киіктіден алпыс шақырым жерде қазақтың соңғы ханы Кенесары Қасымұлының бас қолбасшысы  болған, алты алаштың батыры, қазақтың тәуелсіздігі үшін күресіп, жерімізді сақтап қалған, Ақжолтай Ағыбай батыр Қоңырбайұлының кесенесі тұр. Сол тарихи және рухани мәні зор мұраның сақталуына да ауыл әкімі зор көңіл бөліп, бабалардың аманатын ардақтап, рухына адал қызмет етуде. Бұл көрсетіліп кеткен игі істер – ауылдың Мерей мырзаны әкім ретінде сайлаған жылдар ішінде жеткен жетістіктері. Әкімнің бұдан басқа да көздеген маңызды істерін атқаруға қол қысқалығы тұсау болып, жүзеге аспай жатқан жоспарлары да жоқ емес.

Ауыл тұрғындары әкімдерін өздері сайлай алғандықтан, жұрттың жалпыға ортақ іске жанашырлығы оянып, белсенділігі артқаны ақиқат. Бірлігі жарасқан, кіндік қанымыз тамған жеріміз Киікті ауылының тұрғындары, ауылдағы кем-кетік дүниенің бәрін бұрынғыдай бір әкімнің басына үйіп-төгуден арылып, көп болып кеңесіп, ауылымыздың көркеюіне үлкен үлес қосып жатыр. Ал әкім мырза болса, өзіне жүктелген міндетті шамасы жеткенше адал атқарып, ел сенімін ақтап шығуға тырысуда. Кей әкімдер халқына қызмет етпек түгілі, олардан қашып, көкірегін керіп жүретінін білеміз. Көріп те жүрміз. Ал өзіміз сайлаған әкім – халықпен санасатын, ар-ожданын, адамгершілігін жоғары қоя білген, қарапайым қалпымен қазақтың төріне шыға білетін, қолына билік түссе тасымайтын, қиындық түссе жасымайтын нағыз азамат. 

Бүгінде күн өткен сайын көркейіп, әдемі болып өсіп келе жатқан ауылды көріп, барған сайын қуанамыз. Киікті ауылында туып-өскен, мектебінен түлеп ұшқан, жан-жаққа білім қуып кеткен ауылдастардың атынан әкімге өз ризашылығымызды білдірсек дейміз. Ауыл халқымен етене қайнасып, жергілікті тұрғындардың ұсыныстарына жауапкершілікпен қарап, құрметіне бөленіп, кішкене ғана ауылдың көркеюіне атсалысып жүрген, өте қарапайым, іскер, халық сайлаған әкім – Смағұлов Мерей Қуатбекұлына және оны қолдап, ауызбіршілік танытып келе жатқан ауылдастарымызға  алғысымыз зор. Қазақстанның барлық ауылы, ауданы мен қаласының әкімдерін халық өзі әділетті жолмен сайласа, ел бойынша осындай игі өзгерістер басталары сөзсіз.  Киікті ауылы – соның айқын дәлелі.

Киікті ауылының тұрғындарының атынан, 
қоғам қайраткері  Қанағат ТАРҒЫНҚЫЗЫ