Әкімнің цифрлық жұмыс орны енгізіледі

- Заңды тұлғалардың мүлкін қайта бағалау және әкімдіктердің мемлекеттік дерекқорларға қол жеткізуі бөлігінде Салық кодексінде заңды тұлғалардың мүлкіне кемінде үш жылда бір рет қайта бағалау жүргізу көзделгенін хабарлаймыз. Сонымен қатар мемлекеттік ақпараттық жүйелерге қол жеткізуді қамтамасыз ету үшін бірыңғай «Әкімнің цифрлық жұмыс орнын» енгізу жұмыстары жүргізілуде. Ауылдық округтерде бизнесті дамытуға арналған жеке мемлекеттік бағдарлама әзірлеу ұсынысына қатысты, ауылдық аумақтарды мемлекеттік қолдау шаралары қазірдің өзінде қолданыстағы бағдарламалар мен аудандардың бесжылдық даму жоспарларына интеграцияланғанын атап өтеміз, осыған байланысты жеке бағдарлама әзірлеу орынсыз,- деді Премьер-министр.

Оның айтуынша, өндірілген өнімді сақтау және қайта өңдеу инфрақұрылымын дамыту, шығындарды азайту арқылы халықтың табысын арттыру, логистиканы жақсарту және кәсіпкерлікті дамыту мақсатында «Өнеркәсіпті дамыту қоры» АҚ-ның мемлекеттік қолдау құралдары пайдаланыла отырып, Түркістан және Қостанай облыстарының ауылдық аумақтарында шағын өнеркәсіптік аймақтар құрылған.

- Осындай шағын өнеркәсіптік аймақтар құру тәжірибесі еліміздің басқа өңірлерінде де жалғасатын болады. Сондай-ақ «Ауыл аманаты» жобасы шеңберінде микрокредит берудің жаңа тетіктері әзірленді. Атап айтқанда, өсіруден бастап өткізгенге дейінгі толық өндірістік циклді қамтамасыз ететін қайта өңдеу қызметін қолдау, кооперативтерге басым қолдау көрсету сияқты негізгі басымдықтар айқындалды. Жалпы, «Ауыл аманаты» жобасы аясында 2026-2028 жылдарға арналған республикалық бюджетте 450 млрд теңге бөлу көзделген,- деді Олжас Бектенов.

Бұған дейін ауылдық округтердің бюджетіне жекелеген салық түсімдерін беру мәселесі пысықталып жатқанын жазған едік.