Әл Фараби атындағы ҚазҰУ жаңа технологиялық хабты іске қосты

Әл-Фараби атындағы Қазақ ұлттық университетінде «Farabi Tech Hub» бизнес-инкубаторының салтанатты ашылу рәсімі өтті, – деп хабарлайды Aikyn.kz сайты.

Жас ғалымдар, стартаперлар мен өнертапқыштардың басын қосатын бұл заманауи орталық студенттер мен зерттеушілердің технологиялық бастамаларын қолдауға бағытталған.

Салтанатты шараға университет басшылығы, венчурлық бизнес өкілдері, ІТ саласының жетекші сарапшылары, кәсіпкерлер және жастар ұйымдарының көшбасшылары қатысты.

Жиынды ашқан ҚазҰУ Басқарма мүшесі – ғылыми-инновациялық қызмет жөніндегі проректор Марғұлан Ибраимов жаңа хабтың стратегиялық маңызына тоқталып, бүгінде жоғары оқу орындарының алдында тек маман даярлау ғана емес, сонымен қатар ғылым мен бизнесті ұштастыратын тиімді инновациялық орта қалыптастыру міндеті тұрғанын ерекше атап өтті.

Өз кезегінде «Farabi Tech Hub» директоры Жомарт Жексенбай инкубатордың даму тұжырымдамасымен таныстырып, акселерациялық бағдарламалар, стартаптарды сүйемелдеу тетіктері және университеттің инновациялық экожүйесін кеңейту жоспарлары жөнінде баяндады. Оның айтуынша, бұл хаб жас кәсіпкерлердің идеяларын нақты өнімге айналдыруға мүмкіндік беретін тиімді алаңға айналады.

Кездесуде жоба серіктестері Сырым Серіков пен Жасұлан Сәрсенбаев академиялық орта мен технологиялық қауымдастықтардың бірлескен жұмысы елдегі бәсекеге қабілетті цифрлық экономиканы дамытуға зор үлес қосатынын білдірді. Осы мақсатта шара аясында ҚазҰУ мен Qazaq IT Community, Technovation, SHIN-LINE, Human Capital және Women in Tech компаниялары арасында білім беру, технологиялық және инвестициялық бірлескен жобаларды жүзеге асыруға бағытталған бес маңызды меморандумға қол қойылды. Серіктес компаниялар өкілдері университетте ашылған жаңа алаң ІТ-индустрияға қажетті білікті кадрларды даярлауға және технологиялық кәсіпкерлікті дамытуға кең жол ашатынына сенім білдірді.

Шара соңында қонақтарға арнайы кампус-тур ұйымдастырылып, олар Фараби хабтың заманауи инфрақұрылымымен және қолдау тапқан алғашқы инновациялық жобаларымен танысты.