Әл Фарабидегі жол апатынан қаза тапқан Томиристің әкесі жәбірленуші деп танылды

Фото: Жоғарғы Сот

Тиісті өтінішті оның өкілі Мейірман Шекеев берді. Ол Қылмыстық-процестік кодекстің 71-бабына сүйеніп, адам өліміне әкеп соққан қылмыстар бойынша жәбірленушінің құқықтарын оның жақын туыстары жүзеге асыра алатынын айтты. Егер моральдық зиян келтірілген бірнеше адам болса, олардың барлығы жәбірленуші ретінде танылуы мүмкін.

Нұрлан Шатенов өтінішті қолдап, Томиристің әкесі ретінде сот процесіне қатысқысы келетінін мәлімдеді.

Сотталушы Александр Пактың қорғаушылары өтінішке қарсы болды. Олар Томиристің анасы Арайлым Есенбаеваның мәлімдемесіне сүйеніп, оның Шатеновпен 2018 жылдан бері ажырасқанын және бұрынғы күйеуінің алимент төлемегенін алға тартты.

Әл-Фараби даңғылындағы апат: Айыпталушы көлікте ақау болғанын айтты

Жауап беру кезінде Нұрлан Шатенов ажырасқаннан кейін де қызымен қарым-қатынасын үзбегенін және оның тәрбиесіне қатысқанын айтты.

«Мен оны жақсы көрдім, жақсы көремін және әрқашан жақсы көре беремін. Мен оны өсірдім, тәрбиеледім», деді ол.

Оның айтуынша, қызының қаза болғанын 21 наурыз күні таңертең полиция қызметкерлерінен естіген. Сол уақытта Талдықорған қаласына бара жатқан, алайда хабарды естіп Алматыға қайтып келген.

Нұрлан Шатенов айыпталушының отбасынан ешқандай өтемақы алмағанын және сотталушыны кешірмегенін де жеткізді.

Сондай-ақ ол жүргізушінің әкесімен Тараз қаласында кездескенін айтты.

«Ол жылады, тізерлеп кешірім сұрағысы келді. «Аға, өзіңізді қорламаңыз, бұған сіз кінәлі емессіз. Кінәлі – ұлыңыз. Сіздің кінәңіз – оны дұрыс тәрбиелей алмағаныңыз ғана» дедім», деді Шатенов.

Әл-Фараби даңғылындағы апат: жәбірленуші тарап кінәліге кешірім берді

Оның сөзінше, ол Александр Пактың отбасына дөрекілік танытпаған және ешқандай қорқыту әрекеттеріне бармаған.

Тараптарды тыңдағаннан кейін сот өтінішті қанағаттандырып, Нұрлан Шатеновті жәбірленуші деп таныды. Оның өкілдеріне қылмыстық іске қатысуға рұқсат берілді.

Әл-Фараби даңғылындағы апат: Күдікті сотта өз кінәсін толық мойындады

Еске сала кетейік, қайғылы жол апаты 21 наурызда Әл-Фараби даңғылында болды. Тергеу деректеріне сәйкес, Zeekr көлігін басқарған Александр Пак қарсы жолаққа шығып кетіп, Mercedes көлігімен соқтығысқан. Апат салдарынан үш адам қаза тапты.