Алатау инновациялық технологиялар паркінде есептеу құралдары өндіріледі

Құрылтайда білім сапасы мен гуманитарлық саясат, тарихи жады мен ұлттық бірегейлік мәселелері ерекше назарда.

Елде инновациялық экономика құруға баса мән беріледі. Мәселен, «Алатау» инновациялық технологиялар паркінде өндірілген өнім мен көрсетілген қызмет құны 1 трлн теңгеге жетті. 

Қазір бұл аумақтың пайдалану мерзімін ұзарту және қызмет түрлерінің тізімін толықтыру міндеті тұр. Арнайы экономикалық аймақта жаңа жобалар қолға алынды ма?

«АЛАТАУ» ИТП аумағында 24 жоба қолға алынды

Алматыдағы "Алатау" инновациялық технологиялар паркінде 203 компания жұмыс істеп тұр. Қала әкімдігінің мәліметіне қарағанда, жаңа алаң ашылғалы бері резиденттер шамамен 400 млрд теңгеге жуық инвестиция салған. Нәтижесінде 7 мыңнан астам тұрақты жұмыс орны құрылды. Ал өндірілген өнім мен көрсетілген қызмет құны 1 трлн теңгеге жеткен.

Бүгінгі таңда арнайы экономикалық аймақта тағы 24 жоба қолға алынып отыр. Олардың жалпы құны 265 млрд теңге шамасында. Сабақты ине сәтімен. Егер бұл бастамалар толық жүзеге асырылса, тағы мың адам жұмыспен қамтылады. Қазір аумақ 94 пайызға толған. Небәрі 8 гектарға жуық учаске бос тұр. Ал арнайы экономикалық аймақтың жұмыс істеу мерзімі келер жылдың аяғында бітеді. Өз кезегінде бұл шектеу инвестициялық тартымдылықты төмендетеді. Сондықтан Үкімет басшысы аумақтың пайдалану мерзімін ұзартуды және рұқсат етілген қызмет түрлерінің тізбесін толықтыруды тапсырды.

"АЛАТАУ" ИННОВАЦИЯЛЫҚ ТЕХНОЛОГИЯЛАР ПАРКІ

203 КОМПАНИЯ

₸400 МЛРД ИНВЕСТИЦИЯ

7 200 ЖҰМЫС ОРНЫ

ӨНІМ МЕН ҚЫЗМЕТ ҚҰНЫ - 1₸ ТРЛН

Дәл осы арнайы экономикалық аймақта орналасқан отандық компания цифрлық есептеу құралдарын өндірудің толық циклін қалыптастырды. Мамандар энергия ресурстарының барлық түріне, яғни, жылу, су, электр және газға арналған заманауи есептеу құралдарын әзірлейді.

Сонымен қатар дрон өндірісін локализациялауға кірісіп жатыр. Енді бұл өнімдер электр желілері мен құбырларды тексеруге, төтенше жағдайлар бойынша мониторинг жүргізуге, сондай-ақ ауыл шаруашылығы мен қоғамдық тәртіп салаларының қажеттілігі үшін қолданылады. Онда жасанды интеллектіні енгізіп, тиімділігін арттыру көзделген. Жобаларға 2,5 млрд теңгеге жуық инвестиция салынды. Бұл Цирфландыру және жасанды интеллект жылы аясында бірқатар салаға жаңа серпіліс беруге тиіс.

Ерлан Нәбиев, компания құрылтайшысы:

- Былтырдан бастап елде энергетика және коммуналдық секторды жаңғыртуға арналған Ұлттық жоба басталды. Бұл бұрын-соңды болмаған  үлкен бастама. Соның аясында цифрландыру ғана емес, энергетикалық экономика жаңарады деп үміттенеміз. Біздің кәсіпорын салаға қажетті көлемде өнім шығаруға дайын.

Astana Hub 2 мың компанияны тоғыстырды

Ал Astana Hub инновациялық кластері 2 мың компанияның басын қосып отыр. Олар салық, еңбек және визалық жеңілдіктерге, инфрақұрылым мен халықаралық ынтымақтастық мүмкіндіктеріне ие. 2019 жылдан бастап кластер қатысушыларының табысы 4,3 млрд долларға жетті. Ал былтыр IT-қызметтердің экспортынан 1,5 млрд доллар түскен. 

Мұнда Президент тапсырмасына сәйкес, alem.ai халықаралық жасанды интеллект орталығы құрылды. Ол жоғары технология саласында жаңа көшбасшылар тәрбиелеу үшін маңызды рөл атқарады. Сонымен қатар кейінгі жылдары венчурлық инвестицияға басымдық беріліп жатыр. Инновациялық кластер жанынан қор құрылып, жаңа бастамаларға қолдау көрсетілді. Әрбір стартап үшін түрлі сатыларға қарай 50 мыңнан 500 мың долларға дейін инвестиция салынады.

ЦИТАТА: 

Astana HUB халықаралық инновациялық кластері

Жеті жылдың ішінде Astana Hub халықаралық инновациялық кластерден Қазақстанның цифрлық трансформациясының өзегіне айналды. Бүгінде ол инвесторлар мен әзірлеушілерді, зерттеушілер мен кәсіпкерлерді біріктіріп, дамуға, серіктестікке және жаһандық деңгейге шығуға жағдай жасап отыр.

ИТП үшін бюджеттен тыс қаржы тартылуы тиіс

Инновациялық технологиялар парктері үшін бюджеттен тыс қаржы жұмсалуы тиіс. Үкімет басшысы әкімдіктерге жекеменшік инвестициялар тарту жұмысын жандандыруды жүктеді. Сонымен қатар қосалқы станциялар мен көлік желілерін қоса алғанда инфрақұрылымды одан әрі кеңейту қажет. Бұған қоса халықаралық қаржы ұйымдарымен де ынтымақтастық орнату міндеті тұр.