Halyk орманы: Іле‑Алатау ұлттық паркінде жобаның жаңа кезеңі басталды

Науқаннан қозғалысқа айналған жоба

Биыл көктемде Тимур Құлыбаевтың «Halyk» қайырымдылық қоры бүкіл елді қамтыған GreenAct экологиялық челленджін бастаған еді. Сол кезде мыңдаған оқушы, ерікті және компания қызметкерлері парктерді тазалап, қалдықтарды сұрыптап, көгалдандыру жұмыстарын атқарды.

Осыдан кейін қор экологиялық бағытта жұмысын жалғастырып, Қазақстанның жасыл аймақтарын қалпына келтіру мен кеңейтуге арналған «Halyk орманы» ұзақмерзімді бағдарламасын қолға алды. Қордың бұл бастамасына Экология және табиғи ресурстар министрлігі қолдау білдіріп, өзара бекітілген меморандум аясында бірлесіп жүзеге асыра бастады.

Экологиялық жоба – науқаншылық емес

Экология және табиғи ресурстар вице‑министрі Нұрбек Шарбиев табиғатты қорғау – бір реттік бастамамен шектелмейтінін айтады. Бұл адамдардың өмір салтына айналуы тиіс.

- Табиғатқа жанашырлық танытпайынша, экономикалық өсім де ұзаққа бармайды. «Halyk орманы» және осындай жобалар – экологиялық мәдениетті өміріміздің табиғи бөлігіне айналдыру жолындағы маңызды қадам, - дейді вице‑министр.

Бес жылдық жоспар

Табиғи экожүйелерді қалпына келтіруге және еліміздің өңірлерінде жаңа жасыл аймақтар қалыптастыруға бағытталған жоба 5 жылға есептелген. Оны іске асыруға қор 1 миллиард теңге бөліп отыр. Осы аралықта елдің үш өңірінде – Абай облысында, Іле‑Алатау ұлттық паркінде және Астанадағы жасыл белдеуде – 4 миллионнан аса ағаш отырғызу жоспарланған.

Шаралар «Семей орманы» резерватынан басталды. Алапат өрттен зардап шеккен аумаққа 800 мыңнан аса жас қарағай отырғызылды. Бұл орманды қалпына келтіру бағытындағы жұмыстарға қосылған айтулы үлес болмақ.

Келесі кезең – Іле‑Алатау ұлттық паркінде жүзеге асады. Ондағы 5 гектар аумаққа 14 мың шырша егілмек. Айта кетейік, Іле-Алатау мемлекеттік ұлттық табиғи паркі Үкімет қаулысымен 1996 жылғы 22 ақпанда Алматы облысының Қарасай, Талғар және Еңбекшіқазақ аудандары шегінде Қаскелең, қала маңындағы және Түрген орман шаруашылықтарының базасында құрылған. Мақсат - бірегей ландшафттарды, өсімдіктер мен жануарлар дүниесін сақтау, туризм мен демалыс үшін жағдайларды жақсарту, рекреациялық пайдалану жағдайында табиғи кешендерді сақтаудың ғылыми әдістерін әзірлеу және енгізу.

Болашаққа салынған инвестиция

«Halyk» қоры Қамқоршылық кеңесінің мүшесі Даурен Сартаев жобаның ұзақмерзімді құндылығын ерекше атап өтті.

- Әр егілген ағаш – қаланың тынысына, тұтынудан гөрі қамқорлық жасау әдетіне салынған инвестиция. «Halyk орманы» – табиғатты аялау мәдениетін қалыптастыратын мектеп. Бұл – бізден кейін де қалатын мұра, - дейді.

Қазақстан даласы өсімдіктер мен жануарлар дүниесіне бай, бірақ өндіріс пен урбанизация кейде табиғатқа кері әсерін тигізетіні белгілі. Сондықтан «Halyk» қайырымдылық қоры табиғатқа деген қамқорлық пен саналы көзқарас, келер ұрпақ алдындағы жауапкершілікпен жасыл желекті аумақтарды көбейту арқылы орнықты дамуға үлес қосуды мақсат тұтады.