Әлемде стейблкоинға сұраныс жоғары

Ақшаның да түр-түрі бар. Әлемнің бірқатар елінде электронды валюта тек инвестиция құралы емес, күнделікті төлем құралына айналып келеді.

Әйтсе де мұндай валютаға бір ел күмәнмен қараса, бір елдер барынша енгізіп үлгерді. Енді мұндай ақшаның да бағамы құбылып тұратыны мәлім. Десе де нарықтағы айналымы қарқынды.

Швейцарияда биткоинға кофе алуға болады

Швейцарияның Лугано қаласында қоғамдық көлік, жанармай, медициналық төлемдерден басқасының бәрін биткоинмен төлей береді. Тұрғындардың басым бөлігінде биткоин-әмиян бар. Онымен қалаған тағам түрін, киім-кешегін тіпті кофе де сатып алады. 360-қа тарта дүкен, мейрамханада қолма-қол не карта төлемдерімен қатар, биткоин да айналымда. Тіпті коммуналдық төлемдер мен бала-бақша үшін де электронды ақша жарамды. Десе де ақшаның тілін білетін мамандар бұған алаңдаулы. Cебебі биткоинның бағамы өте құбылмалы. Аз уақыт ішінде бағасы тез өсіп те, күрт төмендеп те кетуі мүмкін. Сол үшін мамандар биткойнды мүмкіндігінше швейцар франкіне, еуроға немесе үкіметтер мен орталық банктер шығаратын басқа валюталарға айырбастау маңызды деп санайды. Мұндай валюталар «фиат валюталар» деп аталады.

Серджио Росси, Фрибурск университетінің экономика бойынша профессоры: 

- Егер менің цифрлық әмияным орналасқан платформада техникалық ақау шықса немесе ол банкротқа ұшыраса, менің криптовалютам бір сәтте жоғалып кетуі мүмкін. Осылайша мен тиісті соманы мәңгілікке жоғалтамын. Криптовалютаның тәуекелі жоғары. Өйткені олар заңсыз транзакциялар үшін қолданылады. Бұл халыққа және қаржы институттарына кері әсер етуі мүмкін. 

Криптовалютаға қызығатындар көбейді

Криптовалютаға қызығатын елдердің қарасы көбейді. Биыл цифрлық монетаны қолдану деңгейі бойынша әлемде  Үндістан, АҚШ, Пәкістан, Филиппин және Бразилия көш бастады. АҚШ-тағы крипто-белсенділік былтырғы жылмен салыстырғанда 50%-ға артты. Бұл елдің транзакция көлемі бойынша әлемдегі ең ірі криптонарық ретіндегі орнын нығайтты. Оңтүстік Азияда бұл қарқын жеделдеді. Бұл тізімде 11-орында Венесэула бар. Былтыр 14-ші орыннан көрінді. Сарапшылар бұны АҚШ пен арадағы геосаяси шиелініспен байланыстырады.

АҚШ президенті Дональд Трамптың Николас Мадуроға қысымды күшейтуі Венесэула азаматтарының цифрлық активтерге деген қызығушылығын арттырған сыңайлы. Сала мамандары мұны «гиперинфляциядан зардап шеккен шағын экономика үшін елеулі серпіліс» деп атады.     

1. Үндістан

2. Ақш

3. Пәкістан

4. Филиппин

5. Бразилия

6. Индонезия

7. Вьетнам

8. Оңтүстік корея

9. Жапония

10. Украина

11. Венесуэла

Дереккөз: TRM Country Crypto Adoption Index 2025

Әлемде стейблкоинға сұраныс жоғары

Әлемдік криптонарықта стейблкоинға сұраныс жоғары. Дерекке сүйенсек, биыл қаңтар-шілде айлары аралығында айналымда болған криптовалюта транзакцияларының 30%-ы стейблкоиндердің үлесінде болған. Құны жыл басынан бері 4 трлн АҚШ долларынан асты. Көрсеткіш былтырғы жылмен салыстырғанда 83%-ға көп.  Стейблкоиндердің 90%-дан астамы АҚШ долларына бекітілген. Криптовалютаның бұл түрі - күміс немесе алтын сияқты нақты әлемдік активтерге бекітілгендіктен баға ауытқыған кезде нарықта тұрақтылықты ұстап тұрады.

«Стейбл» сөзін қазақшаласақ «тұрақты» дегенді білдіреді. Биыл оны заңдастыру бойынша АҚШ, Гонконгта заң қабылданып, Еуроодақта крипто нарықты реттеу туралы ереже енгізілді.