Әлемде биологиялық қоспаларға сұраныс жоғары

Әлемдегі биологиялық белсенді қоспалардың сауда-саттық көлемі 192 млрд долларға жетті.

Бұл көрсеткіш алдағы 8 жылда 414 млрд долларға дейін өсуі мүмкін. Өйткені сұраныс жоғары. Ең ірі тұтынушы ел - АҚШ. Ал Еуропада мұндай қоспалардың сатылымы қатаң бақылауға алынған.

Әлем бойынша биологиялық белсенді қоспаларға сұраныс COVID-19 пандемиясынан кейін күрт артты. Адамдар иммунитетін көтеріп, түрлі ауру-сырқаулардың алдын алу үшін құрамында минералы бар заттарды тұтынуға көшті. Халықтың қартаюы мен қоректік заттардың жетіспеушілігі де сұраныстың артуына сеп болды. Дәрумен мен түрлі қоспалар ересектер арасында танымал. Оларды көбіне ұйқысыздық, күйзеліс және ас дұрыс қорытылмай жайсыздықтар мазалаған кезде осындай дәрмендер мен қоспалардың көмегіне жүгінеді. 

Әлемде биологиялық белсенді қоспаларды ең көп тұтынатын - америкалықтар. АҚШ-та бұл саланың нарығы қарқын алғаны соншалық, дәрігердің арнайы тағайындауынсыз-ақ, тұрғындар өз бетімен дүкен, дәріханалардан, тіпті онлайн тапсырыс беріп сатып алады. Қолжетімді әрі тез. Сұраныстың жоғары болуы да осыдан. Сәйкесінше, сатылымы да табысты жүріп жатыр. Адамдар әдетте оларды күнделікті тағамға қоспа ретінде қабылдайды.

Ал Еуропада биологиялық белсенді қоспалардың сатылымы қатаң бақыланады. Өндірушілер өнімнің құрамы мен таңбалануы туралы билікке хабарлап, арнайы сертификаттаудан өтуге міндетті. Қоспалардың құрамында витаминдер, минералдар, өсімдік компоненттері, хош иістендіргіштер және басқа да рұқсат етілген заттар болуы мүмкін. Тек тексеруден өткеннен кейін ғана қолдануға рұқсат. Қандай да бір пайдалы қасиеті туралы мәліметтер жіті тексеріледі. Компанияларға қоспалардың ауруларды емдейтіні жөнінде жазуға тыйым салынған. Өйткені еуропалық дәрігерлер мұндай қоспалардың дәрі-дәрмекке жатпайтынын алға тартады.

Авторы: Фариза Жанғанаева