Әлемге әйгілі әзербайжандық суретші Алматыға келді

Сакит Мамедовтың есімі бүгінде әлемдік бейнелеу өнеріндегі дара құбылысқа айналған. Ол жарты ғасырға жуық уақытын шығармашылыққа арнап, ұлттық өнерді халықаралық деңгейге көтерген көрнекті қылқалам шебері ретінде танылды. Суретші өзі қалыптастырған опализм атты бірегей көркемдік бағыт арқылы кескіндемеге тың өрнек әкелді. Бұл стильдің атауы асыл опал тасынан бастау алады. Оның картиналарында опалдың құбылмалы сәулесі мен нәзік реңктері, бояулардың тереңдігі мен жарықтың ерекше үйлесімі көрініс тауып, әрбір туындыға қайталанбас көркемдік тыныс береді.

Суретшінің «Естелік картина», «Ойын», «Жаттығу», «Фалабаханлар», «Туған күн», «Ленинград естеліктері», «Жасасын Ыстамбұл», «Мереке», «Той», «Метро», «№13 автобус», «Әуесқой» секілді шығармалары жұртшылықтың жоғары бағасына ие болып, заманауи бейнелеу өнерінің таңдаулы туындыларының қатарына енді.

1983 жылдан бері Сакит Мамедовтың еңбектері әлемнің ең беделді көрме залдары мен музейлерінде тұрақты түрде қойылып келеді. Суретшінің шығармалары Әзербайжанның Мемлекеттік бейнелеу өнері музейінің, Біріккен Ұлттар Ұйымының (БҰҰ), Еуропалық парламент пен Еуропалық одақтың, Ватикан музейінің, Виндзор қамалының, Париждегі әйгілі Opera Gallery мен Galleria d'Arte Mentana, Түркиядағы Долмабахче сарайы галереяларының, Нобель музейі мен Ресей Көркемсурет академиясы музейінің, сондай-ақ Испания, Португалия, Италия, Ұлыбритания, Америка Құрама Штаттары және басқа да көптеген елдің көркемөнер музейлері мен көрме залдарының қорынан лайықты орын алған. Ал оның картиналары Ұлыбритания патшайымы Елизавета II, Моника Беллуччи, Патрисия Каас, Мирей Матьё, Ингрид Альберини, Рафаэлло Мартинетти, Ажда Пеккан, Иосиф Кобзон сынды әлемге танымал тұлғалардың жеке коллекцияларында сақтаулы.

Алматыда суретші Мадина Мұхтарованың шығармашылық көрмесі ашылды

Суретшінің дербес көрмелері Әзербайжанда, Түркияда, Ресейде, Беларусьте, Швецияда, Украинада, Германияда, Францияда, Австрияда, Италияда, Бельгияда, Мысырда, Қытайда, Австралияда, Англияда, Шотландияда, Грузияда, Татарстан Республикасында, Сингапурда және Португалияда зор табыспен өтіп, оның халықаралық беделі мен шығармашылығына деген қызығушылықтың жыл сайын артып келе жатқанын дәлелдеді.

Сакит Мамедовтың шығармашылығына әлемдік өнертанушылар да жоғары баға берген. Белгілі ресейлік өнертанушы Андрей Баженов суретшінің туындыларына тәнті болып: «Сакит Мамедовтың қолтаңбасы Қайта өрлеу дәуірі суретшілерінің қолтаңбасына ұқсайды», деген болатын.

Сакит Мамедовтың Алматыға жасаған сапары ерекше маңызға ие. Қазақ руханияты мен өнерінің ордасы саналатын Алматы тағы да түркі дүниесінің көрнекті өнер қайраткерлерін тоғыстырған шығармашылық кездесулердің мекеніне айналды. Бұл сапар ресми кездесулермен ғана шектелмей, Қазақстан мен Әзербайжан арасындағы мәдени байланыстарды нығайтқан маңызды рухани оқиға ретінде есте қалды.

Алматыда балдырған суретшілердің көрмесі ашылды

Алматыдағы сапары барысында Сакит Мамедов қазақтың көрнекті ақыны, ойшылы, қоғам қайраткері, түркі әлемінің аса беделді тұлғаларының бірі Олжас Сүлейменовпен кездесті. Өнер мен руханиятқа ғұмырын арнаған екі алып тұлғаның жүздесуі өзара құрмет пен шығармашылық үндестіктің жарқын көрінісіне айналды. Кездесу барысында әлемдік мәдениет пен бейнелеу өнерінің дамуына қосқан зор үлесі үшін Сакит Мамедовқа Олжас Сүлейменов атындағы медаль табыс етілді.

Сондай-ақ әлемге әйгілі суретші қазақ бейнелеу өнерінің көрнекті өкілі, талантты қылқалам шебері, «Түркі әлемі» Көркемсурет академиясының академигі Алпысбай Қазығұловтың шығармашылық шеберханасында болды. Ол суретшінің еңбектерімен мұқият танысып, олардың терең философиялық мазмұнын, ұлттық бояуын, орындау шеберлігін және бояу үйлесімінің нәзіктігін жоғары бағалады. Сакит Мамедов қазіргі қазақ бейнелеу өнерінің кәсіби деңгейіне ерекше ризашылығын білдірді.

Жалғыз картина сатқан суретші

Екі елдің танымал суретшілерінің бұл кездесуі Қазақстан мен Әзербайжан көркемөнер мектептерінің рухани жақындығын айқын көрсеткен тағылымды басқосу болды. Осындай шығармашылық жүздесулер бауырлас халықтардың мәдени байланысын одан әрі нығайтып қана қоймай, халықаралық өнер кеңістігіндегі ынтымақтастыққа жаңа серпін береді.

Сакит Мамедовтың Алматыға жасаған бұл сапары қаланың Орталық Азиядағы жетекші мәдени орталық ретіндегі мәртебесін тағы бір мәрте айқындады. Өйткені Алматы – ұлттар достығы бекемделетін, жаңа шығармашылық идеялар дүниеге келетін, өнердің шекара танымайтын мәңгілік құндылығы салтанат құратын рухани кеңістік.