Әлеуметтік нысандар құрылысы қарқын алды

Құрылысшылардың ай­туын­ша бүгінде ғи­­­мараттың ша­тыры су өткізбейтін материал­­­мен қайта жабылды. Сондай-ақ жылуұстағыш материалдармен де қапталды. Бұл жұмыс бү­гін­де аяқталуға таяп қалды.  Ғимаратты гидро, жылу­оқ­шаулағыш материалдармен қап­тату маңызды дейді мамандар. Сол арқылы жауынды күні төбеден су сорғаламайтын болады. Ал қыс кезінде ғимарат ішінде жылу сақталады. 

Мұз сарайында қалып тұрған ендігі жұмыс ол ішінің жаңғыр­тыл­уы. Біраздан бері жөндеу көрмеген ғимарат іші тоза бастаған-ды. Әсіресе айдынды мұз алаңының бетон жабындысы жарылып, сызат пайда болып, үгітіле бастаған еді. Енді құрылыстың соңғы технологиясы бойынша жаңа бетон жабындысы төселеді. Одан бөлек ғима­рат инфрақұрылымына кіре­тін коммуналдық-инженерлік жүйе­лер қайта жүргізіліп, кәсіби спортшыларға да, келген қонақтарға да барынша жайлы жағдай жасалады. Құрылыс сала­­сы­ның мамандары ғимаратты жөндеуде заманауи құрылыс нормасының талаптарына сай жұмыс атқарады. Қызмет сапа­сынан бөлек қолданылатын ма­териал­дардың да сапалы бо­луы­­на үлкен көңіл бөлінеді. Себебі келе­шекте бұл нысан халық­ара­лық ауқымдағы қысқы спорт түр­ле­рін өткізетін маңызды кешенге айналуға тиіс.

Өз кезегінде құрылысқа жауапты мамандардың мәлімдеуінше, Мұз сарайы, жоғарыда айтыл­ған­дай, пайдалануға берілген күннен бері бірде-бір рет жөндеу көрмепті. Нысан біраз уақыт жекенің пайдалануында болды. Ол мемлекет меншігіне қайта өткен соң жергілікті әкімдік іші-сыртын толық жаңғыртуға шешім қабылдады. Жөндеу жұмысы аяқ­тал­ғаннан кейін Мұз сарайы қа­ла тұрғындары мен спорт­­шы­ларға заманауи талаптарға сай қызмет көрсететін болады. Сондай-ақ кешен қауіпсіз әрі мұз үстінде сырғанауды ұнататын жандарға арналған жайлы спорт нысаны болады деген үміт бар. Спорт кешенін биыл тамыз ­айында пайдалануға беру жос-парланып отыр.

Мұз сарайы жөнінде жалпы статистикаға назар аударсақ, оның трибунасының сыйымдылығы 2 500 көрерменді қамтиды. Ал кешен­нің мұз айдынында бір мезетте 300 адам коньки­ тебе алады. Жоға­ры­да атап өткендей спорт сарайы 2017 жылы жекеменшік басқаруға өтіп кеткен. Алайда қала әкімдігі кешеннің әлеуметтік маңыздылығын ескере келе, 2024 жылы спорт ғимаратын қайта мемлекет меншігіне өткізу туралы шешім қабылдайды. Сөйтіп, Мұз сарайының 67 пайыздық үлесі қайтадан мемлекетке қайтарылды.   

Биыл сондай-ақ төтенше жағ­дай­лар қызметі орналасатын 3 нысанды пайдалануға беру жоспарда бар. Соның ішінде Бозарық-3 шағынауданындағы өртке қарсы қызмет бекеті бұл күндері жұмысын бастап кетті. Жалпы, Шымкент қаласында кейінгі жылдары халықтың қауіпсіздігі мен денсаулығына жауапты қызмет түрлерін бір мекенге жайғастыру тәжірибесі қолға алына бастады. Мұның төтенше жағдай кезінде жедел әрекет етуге пайдасы зор екенін айтады мамандар. Оператор пультіне түскен қоңыраудан кейін жедел жәрдем де, өрт сөндіру көлігі де, полиция да бір бекеттен жолға шығып, оқиға болған жерге дереу жетеді.  Мұн­дай әдістің оқыс жағдай кезін­де құтқарушы мен төтенше қыз­мет өкілдеріне уақыттан ұтуы­на көмегі зор. Сонымен құрылыс жобасы аясында төтенше жағдай, полиция, жедел жәрдем бригадасы орна­ласатын кешенде қызметтік бөлмелер, газ-түтіннен қорғау қыз­метінің бекеті, оқу кабинеті, асхана, оқу-жаттығу мұнарасы, спорт алаңы, гараж мен автотұрақ қарастырылған. Жо­ғарыда атап өткеніміздей, жаңа депо жедел қызметтердің оқиға орнына уақыт үнемдеп, жылдам баруына, сондай-ақ жалпы мега­полистің қауіпсіздік жүйесін ны­ғайтуға зор септігін тигізіп отыр.

Айта кету керек, бүгінде Жаңаталап шағынауданында осын­дай заманауи әмбебап кешен­нің құрылысы жүріп жатыр. Мұнымен қоса Тұран шағын­ауданында 4 техника сыя­тын өрт сөндіру депо­сының құры­лыс-монтаждау жұмысы аяқталуға жақын. Атал­ған өрт сөндіру бекеті биыл жыл соңы­на дейін пайдалануға берілмек.