Таразда тұрғын үй құрылысы қарқын алды

Биыл Жамбыл облысында 765 мың шаршы метр баспана пайдалануға берілді. Олардың 20 пайызы бюджет қаржысы есебінен бой көтерді.

Тұрғын үй құрылысы Тараздағы жаңа аудандарда қарқын алған. Қазір шаһарда жаңадан   екі шағын аудан салынып жатыр. Оған қоса «Ұлы Дала» шағын ауданында құрылыс қарқын алды.

Биыл тұрғын үй кезегінде тұрғандарды баспанамен қамту үшін 40 млрд-қа жуық теңге бөлінді. Осылайша екі жарым мыңға жуық адам баспаналы болды. Үйлердің басым бөлігі облыс орталығында салынып жатыр. Мысалы  жаңадан бой көтерген «Шапағат» шағын ауданында биыл 12 көпқабатты үй пайдалануға берілді. Пәтер кілттері үй кезегінде тұрған бюджеттік мекеме қызметкерлері мен әлеуметтік осал топтағыларға берілді.

Эльвира Орынбасарова, қала тұрғыны:

- Біз жаңа концепция бағдарламасымен алдық. 10%-дық жарнамен төлеп алдық. 5%- дық несие төлейміз. Бұл жас отбасыларға өте жақсы мүмкіндік деп ойлаймын. Қаншама жас отбасы бұлай ала алмай жүр. Бізге өте керемет мүмкіндік болды. Басында ата-анамыздың үйінде тұрдық. Осындай кең үйге қол жеткізгенімізге қуаныштымыз.

Тараздың өзінде биыл үш шағын ауданда бой көтерді. Солардың бірі  қаланың шығыс бөлігіндегі «Балауса» шағын ауданы. Мұнда көпқабатты 22 үй салынды. Жалпы 2025 жылғы тұрғын үй құрылысы былтырмен салыстырғанда шамамен 1 пайызға жоғары.

Дәулет Дайрабаев, Құрылыс басқармасының бөлім басшысы:

- Алдағы уақытта тұрғын үй құрылысы көлемін арттыру және кезектегі азаматтарды кезең-кезеңімен баспанамен қамту жұмыстары жалғасын табады. Келер жылға тоқталатын болсақ, бізде биылдан өтпелі 26 тұрғын үйдің құрылысы жүргізіледі. Сонымен қатар Асқаров көшесінің соңында орналасқан 16 Мөлтек ауданында 30 көпқабатты тұрғын үйдің құрылысы басталды. Сонымен қатар 36 тұрғын үйдің жобалау сметалық құжаттамасы дайындалды.

Қазір облыс бойыншга үй кезегінде 40 мыңнан аса адам тұр. Кезек мәселесін шешу үшін билік дайын үйлерді де сатып алып жатыр. Мысалы, биыл 1 415 пәтер сатып алынды.

Авторлары: Мерей Бает, Бақытжан Бапаев, Елдар Байділді