Әлеуметтік салада нақты міндеттер орындалады

Келер аптада елімізде педагогикалық жоғары оқу орындары өкілдерінің қатысуымен кеңес өтеді. Онда қордаланған мәселелер назарға алынып, күн тәртібіндегі мақсат-міндеттер айқындалады. Бұл жайында Премьер-министрдің орынбасары, Мәдениет және ақпарат министрі Аида Балаева фейсбук желісі арқылы хабарлады. 

«Президент азаматтардың өмір сүру сапасын арттыруға ерекше көңіл бөліп отыр. Алдағы уақытта өзге де әлеуметтік мәселелер бойынша жұмыстар күшейтіледі», - деді Аида Балаева.

Сапалы білім – сапалы қоғамның негізі. Мұғалімдердің кәсіби деңгейі білімі мен біліктілігіне тікелей байланысты. Сала басшысы осылай деп, педагогтердің кәсіби біліктілігін арттыру ерекше маңызға ие екеніне тоқталды. Мәселе алдағы аптада өтетін арнайы жиында жан-жақты талқыланады. Сондай-ақ Мемлекет басшысы салаға қатысты жаңа міндеттер жүктеді. Оның ішінде әлеуметтік шығындарды оңтайландыру тапсырылды.

Аида Балаева, ҚР Премьер-Министрінің орынбасары, Мәдениет және ақпарат министрі:
- Бұл ретте халықты жұмыспен қамтуға баса назар аударылады. Осыған байланысты еліміздің жоғары оқу орындары мен әкімдіктері еңбек нарығын жан-жақты зерттеу бойынша жұмыс жүргізуге тиіс. Біз елдегі барлық кәсіпорындар, ұйымдар мен мекемелердің кадрлық мәселесін талдап, қай салада кадр тапшылығы, қай салада артықшылық байқалатынын саралаймыз. Сондай-ақ цифрландыру мен жасанды интеллектті қолдануға байланысты нақты қай салаларда жұмыс орындары қысқаруы мүмкін екенін анықтаймыз.

Әлеуметтік төлемдер мен қызметтерді толық цифрландыру жалғасады. Әлеуметтік қолдау саласында әділдік пен ашықтықты қамтамасыз ету үшін қызметтердің сапасын қайта қарау міндеті қойылды. Сонымен қатар медицина саласын жаңғырту – басым бағыттың бірі ретінде қала бермек.

Аида Балаева, ҚР Премьер-Министрінің орынбасары, Мәдениет және ақпарат министрі:
- Медицина саласындағы қызмет сапасын жақсарту, ана мен бала денсаулығын қорғау, сондай-ақ онкология мен созылмалы аурулармен күресті күшейту басты назарда болады. Сонымен қатар медицина саласын толық цифрландыру, дәрі-дәрмек қоры мен емханалар жұмысын электронды бақылау арқылы ашықтықты қамтамасыз етуге атсалысамыз.

Қорыта айтқанда, басты міндет — Президент тапсырмаларын уақытылы және сапалы орындау. Бұл үшін ведомстволар арасындағы өзара байланысты күшейтіп, өңірлік әкімдіктермен, депутаттармен, сарапшылармен және қоғам өкілдерімен тығыз қарым-қатынаста жұмыс істеу маңызды.