Әлеуметтік сауалнама нәтижесі

2025 жыл еліміз үшін сан салада толайым өзгерістерге толы жыл болды.

Ал оның игілігін бұқара көріп, бағалап жатыр ма? Бұл сауалға жауап іздеу үшін мамандар арнайы әлеуметтік сауалнама жүргізген еді. Нәтижесін бірге білейік.

Биыл еліміз үшін әлеуметтік һәм саяси өзгерістер жылы болды. Алайда қарапайым бұқара мұны қалай қабылдады? Арнайы сауалнама кезінде осы сұраққа жауап ізделді. Оған биыл 1000 респондент қатысқан. Отандастарымыз бірқатар сала бойынша атқарылған жұмыстарға баға берді. Олар жылдың ең басты жетістігі цифрландыру деп атап көрсеткен. Сұралушылардың 81 пайызы соның арқасында күнделікті өмірде кездесетін мәселелер оңай шешіліп жатқанын жеткізген.

Расул Рысмамбетов, Ұлттық аналитикалық орталықтың басқарма төрағасы:

- Респонденттердің 81 пайызы цифрландырудың арқасында күнделікті мәселелерді шешу оңай бола түскенін айтады. Демек, бұл бағыттағы жұмыстарға бұқараның біразының көңілі толады. Бұл құптарлық жайт. 

Сауалнамада халықтың оң пікірін ең көп жинаған сала - инфрақұрылым жайы. Қазақстандықтар биыл жылу, су секілді коммуналдық қызметтердің сапасы әлдеқайда жақсарғанын айтқан. Дәлірек айтсақ, респонденттердің 75 пайызы осылай жауап қатты.

Расул Рысмамбетов, Ұлттық аналитикалық орталықтың басқарма төрағасы:

- Көптеген қала мен өңірлерде инфрақұрылымның жақсарғаны жайлы да мәлімет алдық. Яғни халық мемлекеттің бұл салаға қомақты қаржы салып жатқанынан хабардар. Мұны жаңа жұмыс орындарың ашылуы, жол, ауыз су, өзге де инженерлік желілердің жаңаруынан көріп, байқап отыр. 

Биыл елде заңсыз шетел асқан активтерді елге қайтару бойынша ауқымды жұмыс жүргізілді. Қайтқан қаржыда қайыр бар дегендей, қазынаға қайта оралған миллиардтар тек елдік мәселелерді шешуге бағытталды. Өңір-өңірде мектеп, аурухана сынды аса қажет әлеуметтік нысандар бой көтерді. Игі іске сауалнамаға қатысқандардың 57 пайызы қолдау білдірді.

Назерке Тоқжан