Алғашқы әмір Оқы! : имамдар жастарды білім мен әдепке шақырды

Президент Қасым-Жомарт Тоқаев қоғамдық мәдениетті нығайту, жастардың білімге деген қызығушылығын арттыру және азаматтық жауапкершілікті қалыптастыру мәселесін үнемі көтеріп келеді. Мемлекет басшысы жастарды кітап оқуға, жан-жақты ізденуге және заман талабына сай бәсекеге қабілетті болуға шақырып, елдің болашағы білімді әрі тәрбиелі ұрпақтың қолында екенін бірнеше рет атап өтті.

Бұл ұстанымдарды Қазақстандағы дін қызметкерлері де қолдап, мешіттерде әдеп, білім және адамгершілік тақырыптарын тұрақты түрде насихаттап келеді.

Маңғыстау облыстық орталық «Бекет ата» мешітінің наиб имамы Жұмабай Қуандықұлы исламда амандасу әдебіне ерекше мән берілетінін айтады.

«Екі ер адам кездескенде қол алысып амандасу жеткілікті. Егер ұзақ уақыт көріспеген немесе алыс сапардан келген болса, төс қағысып амандасуына болады. Ал сүйісіп амандасу немесе оған ұқсас әрекеттер біздің дінімізде де, ұлттық дәстүрімізде де құпталмайды», – деді ол.

Имамның айтуынша, қарапайым сәлемдесудің өзі адамның тәрбиесі мен ішкі мәдениетінің көрінісі. Сондықтан ислам да, қазақы таным да ұстамдылық пен қарапайымдылықты жоғары бағалайды.

Ал «Бір мұнаралы тас» мешітінің наиб имамы Абдулла Ержанұлы кез келген жетістіктің негізінде білім тұратынын атап өтті.

«Құран Кәрімде түскен алғашқы әмір – "Оқы!". Бұл білімнің исламдағы орнының қаншалықты жоғары екенін көрсетеді. Қандай іске кіріспес бұрын адам білімді болуы қажет. Болашақтың берік болуы – білімді ұрпақ тәрбиелеуге байланысты», – деді ол.

Оның сөзінше, білім мен әдеп – егіз ұғым. Нағыз білім адамды жауапкершілікке, ізгілікке және қоғам алдындағы міндетін сезінуге жетелейді.

Ақтөбе облысының бас имамы Амантай Садиев те білімнің қоғамды дамытатын басты күш екенін айтты.

«Қазақ "Білімді мыңды жығады, білекті бірді жығады" дейді. Ілім үйрену – үлкен еңбек. Ал алған білімді өмірде дұрыс пайдалану одан да жауапты іс. Жастарымыз білімге ұмтылса, қоғамда сауатты әрі саналы азаматтардың қатары көбейеді», – деді бас имам.

Ол білім адамның кәсіби ғана емес, рухани тұрғыдан да кемелденуіне ықпал ететінін ерекше атап өтті.

Ал «Ақмешіт-Сырдария» мешітінің наиб имамы Нұрсұлтан Уәлиұлы мұсылман мәдениетіндегі сәлемдесудің тәрбиелік мәніне тоқталды.

«Мұсылмандар кездескенде "Ассалаумағалейкум" деп амандасып, қол алысады. Пайғамбарымыздың хадисінде екі мұсылман қол алысып амандасса, қолдары ажырағанға дейін күнәлары кешірілетіні айтылған. Ал құшақтасып немесе сүйісіп амандасуға қатысты сұралғанда, Алла Елшісі оны құптамаған», – деді ол.

Дін өкілдерінің айтуынша, сәлемдесу әдебі, білімге ұмтылу және жауапкершілік – қоғамның тұрақты дамуына негіз болатын құндылықтар. Әдепті мінез бен терең білім ұштасқанда ғана саналы, мәдениетті әрі ел болашағына бейжай қарамайтын азамат қалыптасады.