Алматы базарында күмәнді жұмыртқалардың ірі партиясы табылды

Алматы базарында заңсыз әкелінген тауықтың 13 мыңнан аса жұмыртқасы анықталды. Бұл туралы Сауда және интеграция министрлігі мәлім етті, - деп хабарлайды Tengrinews.kz.

Алматы базарында заңсыз әкелінген тауықтың 13 мыңнан аса жұмыртқасы анықталды. Бұл туралы Сауда және интеграция министрлігі мәлім етті, - деп хабарлайды Tengrinews.kz.

Мамандар ветеринариялық қауіпсіздік талаптарының сақталуын бақылау мақсатында қаланың сауда нысандарында кезекті рейд жүргізді.

"Барыс-IV" базарын тексеру барысында ветеринариялық ілеспе құжаттары және тиісті таңбалауы жоқ, арнайы қаптамасыз сатылып жатқан тауық жұмыртқалары анықталды. Заңсыз айналымнан 13 680 дана жұмыртқа тәркіленді.

"Тиісті хаттамалар толтырылды. Кінәлі тұлғаларға жалпы сомасы 1 297 500 теңге айыппұл салынды", - деп хабарлады ведомство.

Тамақ өнімдерін жою ережелеріне сәйкес, тәркіленген 13 680 жұмыртқа қалалық мал қорымына жеткізіліп, "Беккер шұңқырына" көмілді.

Анықтама: Беккер шұңқыры — ықтимал қауіпті өнімдер мен биологиялық қалдықтарды қауіпсіз кәдеге жаратуға арналған арнайы құрылыс.

Сондай-ақ заңбұзушылықтар анықталғаннан кейін көтерме және бөлшек сауда ұйымдарының басшыларына ветеринариялық-санитариялық талаптарды сақтау бойынша түсіндіру жұмыстары жүргізілгені нақтыланды. Бұдан бөлек, оларға басқа елдерден заңсыз әкелінген өнімдерді сатуға тыйым салу туралы ресми хабарламалар жіберілді.

Тағы оқыңыз: Сайрандағы тәтті мақта сатушысының суреттері алматылықтардың ашуын келтірді