Алматы ипподромының аумағында тұрғын үй кешені салына ма әкімдік жауап берді

– Алматыда 1930 жылы салынған тарихи ипподром біреулердің көз құртына айналыпты. 40 гектардан астам жер қып-қызыл ақша ғой. Соған тарсылдатып тұрғын үй салмақшы. Сонда тарихи нысанның құны көк тиын ба? Онсыз да автокөлікке толған Алматы көк түтінге қақалып тұр, - делінген жазбада. 

Алайда «Тенгри Инвест» ЖШС бұл қауесетті жоққа шығарды. Компания директоры Ержан Майлыбаевтың айтуынша, ипподром аумағында ешқандай құрылыс жүргізіліп жатқан жоқ және тұрғын үй немесе коммерциялық нысандар салу жоспары да жоқ.

– Ипподром бұрынғыдай жұмыс істеп тұр, мұнда ат спорты жарыстары өткізіліп, ұлттық спорт түрлерін дамыту ісі жалғасып келеді, - деді ол. 

Алматы әкімдігі де бұл ақпараттың негізсіз екенін растады.

– Егжей-тегжейлі жоспарлау жобасына сәйкес, аталған аумақ ипподром ретінде бекітілген, ал оны бұзу жөнінде ешқандай рұқсат берілген жоқ. Алматы ипподромы тарихы терең әрі мәдени маңызы зор нысан болып қала береді. Мұнда дәстүрлі түрде еліміздегі ат спорты мен ұлттық мәдениетті насихаттауға бағытталған ірі спорттық және қоғамдық іс-шаралар өткізіліп жүр, - деп хабарлады әкімдік. 

Алматы ипподромы – 1930 жылы салынған, Қазақстандағы ең көне және ең ірі ат спорты нысаны. 2021 жылы ол «сәулет және мәдениет ескерткіші» ретінде мемлекеттік қорғауға алынған.

Ал атбегілер Алматы әкімі Дархан Сатыбалдыға ашық хат жолдап, нысанның апатты жағдайға жеткенін және тарихи мұра ретінде қорғауды сұрады.

Атбегілердің хатында ипподромның қазіргі жағдайы сын көтермейтіні айтылған. Олар ғимараттардың тозып, инженерлік желілердің істен шыққанын, ат қоралар мен манеждердің жөндеуді қажет ететінін атап өткен.

– Ипподром балшық пен шаңға батып кетті, ат тезегі жылдар бойы тазаланбай, шыбын қаптады. Вет.лазарет жабық және 15 жылдан астам жұмыс істемейді, сырттағы аула дәретханалары – ағаштары шіріген үйшік. Ауыз су соғыс жылдарындағыдай – тәулігіне үш сағат қана беріледі. Кеше аумақта жарық жоқ, біз мектептен кейін атқа мінуді үйренгісі келген балалар үшін қорқамыз, - делінген хатта.

Хат авторлары ипподромды жекеменшік иесінің тиісті деңгейде күтіп ұстамай отырғанын айтып, оны коммуналдық меншіктің қарамағына қайтаруды сұраған.

– Меншік иесі тарихи және мәдени ескерткішті сақтау жөніндегі міндеттемелерін ұзақ жылдар бойы орындамауына байланысты оны коммуналдық меншікке өткізуді сұраймыз, - дейді атбегілер.

Бұған дейін Алматының бұрынғы әкімі Ерболат Досаев қалалық ипподромның болашағы туралы пікір білдірген еді. 

Досаев сол кезде ипподром бойынша келіссөздер жүргізіліп жатқанын мәлімдеген еді.

Еске салайық, бұған дейін де Алматыдағы ипподром бұзылып, орнына жаңа тұрғын үй кешені салынатыны туралы қауесет айтылған. 

Алайда экс-әкім Ерболат Досаев мұндай қауіп жоқ екенін айтқан.