Алматы облысы жолдарындағы жаппай айыппұлдар: ІІМ түсініктеме берді

Техникалық ақауға байланысты кейбір жүргізушілерге жылдамдықты асырғаны үшін қате айыппұлдар рәсімделген. Бұл туралы Қазақстанның Ішкі істер министрлігі хабарлады. 
ІІМ Әкімшілік полиция комитетінің төрағасы Мұрат Қабденовтің айтуынша, техникалық ақау 13–14 тамыз күндері  тасжолдардағы орташа жылдамдықты асыруға қатысты кейбір құқық бұзушылықтар қате рәсімделген.
ІІМ мұндай қате айыппұлдардың барлығын анықтаған, енді олар автоматты түрде жойылады. Сондықтан жүргізушілерге полицияға арнайы жүгінудің немесе айыппұлдың қате салынғанын өз бетінше дәлелдеудің қажеті жоқ. 
Кейбір жүргізушілер қате келген айыппұлдарды төлеп үлгерген. ІІМ қазіргі уақытта тиісті органдармен бірлесіп төленген қаражатты қайтару тетігін пысықтап жатқанын хабарлады.
Айта кетейік, бұған дейін Алматы облысының жүргізушілері жол қозғалысы ережелерін автоматты түрде тіркейтін камералардан жаппай айыппұл келе бастағанына шағымданған. Мәселені алғашқылардың бірі болып журналист Ришат Аскарбекұлы көтерген. Оның айтуынша, Алматы – Тараз бағытында тұрақты жүретін жүргізушілерді қоса алғанда, бірнеше автокөлік иесіне қысқа мерзім ішінде көп мөлшерде айыппұл келген. 
Аскарбекұлының өзі бір апта ішінде жалпы сомасы шамамен 50 мың теңге болатын төрт айыппұл алған. Алғашқыларын 50 пайыздық жеңілдікпен төлеген ол кезекті айыппұл келгенде күмәнмен қараған. 
Оның сөзінше, трассаның тиісті учаскелерінде жылдамдық шектеуі 70 және 110 км/сағ болғанымен, нұсқамалардың бірінде көлік жылдамдығы 97 км/сағ деп көрсетілген. Сондай-ақ құжаттағы құқық бұзушылық тіркелген уақыт камера түсірген суретпен сәйкес келмеген.
Басқа жүргізушілер де қысқа уақыт ішінде бірнеше хаттама алғанын мәлімдеген. Кейбіріне төрт-бес айыппұл келсе, бір жүргізуші бір күннің ішінде 14 айыппұл алғанын айтқан.
Шағымдардан кейін Алматы облысының Полиция департаменті тексеру жүргізіліп жатқанын хабарлаған еді. Енді ІІМ ақпараттық жүйеде техникалық ақау болғанын растады және соның салдарынан қате қалыптастырылған хаттамалардың автоматты түрде жойылатынын мәлімдеді.