Алматы облысында 9100 Sergek камерасы орнатылды

Алматы облысында 9100 «Sergek» интеллектуалды бақылау камерасы орнатылды.

Олар жол апаты жиі тіркелетін аумақтарға қойылған. Жүйе жылдамдықты асыру, жолақ сызығын бұзу және өзге де ереже бұзушылықтарды анықтай алады. Жоба жүргізушілерді тәртіпке келтіріп, апат санын азайтуға бағытталған.

Алматы облысында алғаш рет «Сергек» интеллектуалды қауіпсіздік жүйесі іске қосылды. Бұл өңір ұзақ уақыт бойы жол-көлік оқиғаларының саны бойынша алдыңғы орында тұрған. Енді жолдардағы жағдайды тоғыз мыңнан астам бейнекамера мен үш жүзден аса арнайы аппараттық-бағдарламалық кешен бақылайды. Мұнда жедел басқару орталығынан, полиция қызметкерлері тәулік бойы жол қозғалысы мен қоғамдық қауіпсіздікті қадағалайды.

Биылғы жылдың алғашқы жеті айында Алматы облысында алты жарым мыңнан астам жол апаты тіркелген. Бұл – ел бойынша ең жоғары көрсеткіштердің бірі. Былтырмен салыстырғанда жол-көлік оқиғасынан зардап шеккендер саны 60 пайызға көбейген.

Арнат Сүлейменов, Жедел басқару орталығы бастығының орынбасары:

- Күніне 100-ден астам құқық бұзушылық анықталады. Ол тек инспекторлармен және тағы автоматты түрде күніне мыңнан астам құқық бұзушылықтар анықталады. Осы камераларды орнату мақсаты айыппұл салу емес, бұл камераларды орнату мақсаты - апаттық жағдайларды азайту.

«Sergek» жүйесі жасанды интеллект пен бейнебақылауды біріктіреді. Жүйе жағдайды онлайн бақылап, оқыс оқиғаларға жедел әрекет етуге мүмкіндік береді. Камералар бейнебақылау бұрын болмаған 32 ауылдық елді мекенге де орнатылған.

Дәулет Салитов, көлік жүргізушісі:

- Ол енді бір жағынан жүргізушілерге жақсы, бір жағынан кішкене қолайсыз болады. Неге десе енді штрафқа көп түседі. Бірақ енді менің өзімнің ойым, көп болғаны жақсы деп ойлаймын. Қай жерде камера болса да сақтық ережесін сақтап жүргенімізге дұрыс деп есептеймін.

Полицейлердің айтуынша, жаңа жоба жолдағы апат санын азайтып қана қоймай, құқықбұзушылықтардың алдын алуға да ықпал етеді. «Sergek» жүйесі бүгінде еліміздің барлық ірі қалаларында жұмыс істеп тұр.

Авторлары: Гүлім Советхан, Аят Дүйсембай, Аманжол Жөнкешов