Алматы облысында археологиялық басылым таныстырылды

Алматы облысында «Рахат археологиялық кешені» атты монография мен «Есік» музейіне арналған қытай тіліндегі жолнұсқаулықтың тұсауы кесілді.

Бұл «Есік» музей-қорығы мен Қытайдың Шэньси провинциясындағы Археология институтының бірлескен жұмысы. 2017–2023 жылдары екі елдің ғалымдары «Рахат» археологиялық кешенінде бірлескен қазба жұмыстарын жүргізген. Нәтижесінде ерте темір дәуірінен орта ғасырларға дейінгі мәдениетті анықтады. Жаңа кітаптар «Есік оқулары» VI Халықаралық ғылыми-тәжірибелік конференцияда таныстырылды. Шараға Қазақстан, Ұлыбритания, Қытай, Қырғызстан, Пәкістан және тәжікстандық мамандар қатысты. Айта кетейік, 55 жыл бұрын Есік қорғанынан Алтын адам табылған. Конференцияға қатысушылар елдің символына айналған жәдігерді тапқан және «Есік» музей-қорығын құруға үлес қосқан археолог Бекмұханбет Нұрмұханбетовті еске алды.

Чжон Цзиянь Рун, Шэньси провинциясының Археология институтының директоры:

-  Қытай тіліндегі жолнұсқаулықта Алтын адамның тарихы мен оның феноменін жақыннан тануға болады. Бұл жердің ерекше, киелі мәні бар екенін атап өткім келеді. Бұл шара Қытай мен Қазақстан арасындағы достық қарым-қатынасты нығайта түседі, деп сенемін. Біздің мақсат ынтымақтастық пен тәжірибе алмасу арқылы археологиялық ғылымды дамыту.

Ребекка Робертс, Макдональд археологиялық зерттеулер институтының ғылыми қызметкері:

-  «Есік» музейі мен сақ мұралары тек Қазақстан үшін емес, әлем үшін маңызды. Мен Тұргеннен табылған күміс қасықтарды зерттеп, Пәкістан мен Грекиядан табылған бұйымдармен байланысын байқадым. Сақ қорғандарындағы құс бейнесі бар ыдыстар мәдени белгінің, болмыс пен мәртебенің символы.