Алматы облысында астық өңдеу зауыты ашылды

Алматы облысында астық пен майлы дәнді дақылдарды терең өңдеуге арналған жаңа зауыт салтанатты түрде ашылды.

«Қапшағай бидай өнімдері» агроөнеркәсіптік кешені алдағы уақытта жылына 1 млн тонна астық өңдейтін елдегі ірі кәсіпорындардың біріне айналады. Бұл жаңа өндіріс ошағын іске қосуға 15 млрд теңге инвестиция тартылды.

«Қапшағай бидай өнімдері» зауыты Алматы облысының аграрлық секторындағы ірі инвестициялық жобалардың бірі. Жылына 1 млн тонна астық өңдейтін агроөнеркәсіптік кешеннің іске қосылуы өңірдегі ауыл шаруашылығы өнімдерін өңдеу саласының дамуына тың серпін береді.

Марат Сұлтанғазиев, Алматы облысының әкімі:

- Бұл 40 жыл тарихы бар зауыт. Бірақ 20-25 жыл бос тұрған. Жұмыс істемеген. Былтырдан бастап осы инвесторлар келіп, оның ішінде өзіміздің Қазақстанның компаниясы бар, ҚХР компаниясы бар, бұны жаңғыртудан өткізді. 1,5 млн тонна бидай перевалка жасауға мүмкіндіктері бар, 700 мың тоннаға дейін қабылдау мүмкіндіктері бар.

Азат Сұлтанов, ҚР Ауыл шаруашылығы вице-министрі:

- Контейнерлік терминал мен темір жол желілерінің құрылысы логистиканың дамуына оң әсерін тигізеді. Өндірістің әлеуметтік-экономикалық әсері зор.

Ұлы Жібек жолының бойында орналасқан Алматы облысында инфрақұрылымның жан-жақты дамуы мен инвесторларға жасалған қолдау агроөнеркәсіп кешенінің тұрақты өсімін қамтамасыз етіп отыр. Ірі кәсіпорындардың ашылуы агррарлық саланың бәсекеге қабілеттілігін арттыра түседі.

Ринат Тоқпанов, "Қапшағай бидай өнімдері" ЖШС директоры:

- Біз болашақта тәулігіне 2500 тонна мал азықтық ұн өндірмекшіміз. Ол көршілес Қытай Халық Республикасы мен Азия - Тынық мұхиты елдеріне экспортталады. Қазірдің өзінде 300 жергілікті тұрғынды жұмыспен қамтамасыз етіп отырмыз. Кейін мұнда 500 адам тұрақты еңбек етеді.

«Қапшағай бидай өнімдері» зауыты болашақта инновациялық әрі экспортқа бағдарланған өндірістің үлгісіне айналады. Біз жоғары сапалы өнім шығаратын және ауыл шаруашылығы өнімдерін өңдеуді дамытатын жобаларды әрі қарай да қолдай береміз», – деді өңір басшысы Марат Сұлтанғазиев. 

Ардақ Айбарұлы, Аманжол Жөңкешов