Алматы облысында көшелерді су басып, бірнеше жол жабылды

Төтенше жағдайлар министрлігі, «Қазселденқорғау» қызметі, полиция және жергілікті әкімдіктердің күшімен төтенше жағдайдың салдары жедел түрде жойылып, жағдай тұрақтандырылды. Зардап шеккендер жоқ. Абай ауылы мен «Водник» бау-бақша серіктестігінде құтқарушылар су сорып шығару жұмыстарын жүргізіп, өзен арналары тазартылды.

Сонымен қатар өңірде көлік қозғалысына қатысты шектеулер сақталуда. Түрген өзеніндегі су деңгейінің күрт көтерілуіне байланысты Түрген – Ассы автожолындағы апатты көпір арқылы қозғалыс уақытша тоқтатылды. Сондай-ақ басқа бір көпірді су шайып кету қаупіне байланысты 1 шілде күні сағат 13:00-ден бастап «ҮАК каналы бойындағы облыстық автожол» бағыты бойынша көлік қозғалысы толық жабылды.

Алматы облысында тауда адасып кеткен 74 жастағы зейнеткер құтқарылды

Таулы аймақтағы жағдай әлі де күрделі. Бұған дейін Каскелең шатқалында өзеннің қатты ағысы көпірлердің біріне зақым келтірген болатын. Осыған байланысты Іле Алатауының таулы бөлігінде сел жүру қаупі жарияланды.

«Қазгидрометтің» болжамына сәйкес, 2 шілде, бейсенбі күні Алматы қаласы мен облысында қайтадан қатты жаңбыр жауады деп күтілуде. Осыған байланысты сел жүру қаупі жоғары деңгейде сақталып отыр.