Алматы облысында өңір дамуына үлес қосқан үздіктер марапатталды

Алматы облысында өңірдің дамуына үлес қосып, қажырлы еңбек етіп жүрген білікті мамандар марапатталды. Жаңа жыл қарсаңында медиа саласының өкілдері, жас мамандар және 150-ден астам спортшыға құрмет көрсетілді. 

Қонаев қаласында облыс әкімінің «Самғау» арнайы медиа сыйлығы мен «Заңғар» жастар байқауының жеңімпаздары анықталды. Салтанатты шарада ақпарат саласының үздіктері мен белсенді жастарға марапаттар табысталды. Жеңімпаздар 500 мыңнан 2 миллион теңгеге дейін қаржылай сыйақы алды.

Балнұр Асанова, «Заңғар» байқауының жеңімпазы:

- Ең алдымен, Алматы облысы әкіміне жастарды қолдауға бағытталған жүйелі саясаты мен жас мамандардың еңбегін бағалап, сенім артып отырғаны үшін шын жүректен алғыс айтамын. «Заңғар» жастар сыйлығы – бұл біз үшін үлкен жауапкершілік және жаңа белес.

Сонымен қатар спортта жоғары нәтиже көрсеткен спортшылар мен жаттықтырушылары марапатталды. Жалпы 152 спортшы мен 57 жаттықтырушының еңбегі еленді.

Ертуған Зейнуллинов, бокстан әлем чемпионатының қола жүлдегері:

- Басты арманымыз ғой әлем чемпионы, олимпиада чемпионы болу. Сол мақсатымызға жетуге алғашқы қадамдар деп ойлаймын. Бұйырса, бұдан ары қарай барша жігерімізді салып, үлкен жетістіктерге жетуге барымызды саламыз.

Қатысушылардың айтуынша, мұндай марапат алдағы жетістіктерге ынталандырып, сенімділікті арттырады.

Авторлары: Гүлім Советқан, Аят Дуйсембай, Аманжол Жонкешов