Алматы облысында Оңтүстік Корея телехикая түсіріп жатыр

Алматы облысында Оңтүстік Кореяның әйгілі кино компаниясы мен қазақстандық «Atadala» студиясы бірлесіп телехикая түсіруді бастады.

Сериалдың түсірілім алаңдары Ұйғыр ауданындағы Дардамты ауылы, Айлы мен Қара шатқалдар, сондай-ақ Қонаев қаласындағы Іле өзенінің жағалауын қамтиды.

Облыс әкімі Марат Сұлтанғазиев түсірілім барысымен танысып, шығармашылық топпен және жергілікті тұрғындармен кездесті. Оның айтуынша, халықаралық жобалар өңірдің креативті экономикасын дамытуға, туристерді тартуға және Алматы облысының танымалдығын арттыруға ықпал етеді.

Түсірілімге актерлер, каскадерлер, техникалық мамандар мен жергілікті мердігер ұйымдар қатысуда. Жоба барысында аймақтағы қонақүйлер, қоғамдық тамақтану орындары мен көлік қызметтері пайдаланылып, жергілікті тұрғындар да жұмысқа тартылған.

Шығармашылық топ Қазақстанды таңдауын табиғи ландшафттардың алуан түрлілігімен және халықаралық кино өндірісіне қолайлы жағдайымен түсіндірді.

Телехикаяның бас продюсері — Руслан Пак. Сериалдың көрсетілімі 2027 жылға жоспарланған. Жоба халықаралық ынтымақтастықты нығайтып, креативті индустрияны дамытуға және Алматы облысының инвестициялық, туристік имиджін күшейтуге бағытталған.

Бүгін, 15:36