Алматы облысының тұрғындары 99,9 % интернетпен қамтылды

Алматы облысы бойынша тұрғындардың 99,9 пайызы интернет пайдаланып отыр.

Бұл туралы облыс басшысы Марат Сұлтанғазиев цифрландыру және ақпараттық технологиялар қызметкерлері күніне арналған салтанатты жиында айтты.

Бүгінгі күннің басты талаптарының бірі – цифрлық трансформация. Мемлекет басшысы Жолдауында «Қазақстан алдағы үш жылда толыққанды цифрлық мемлекет болуы тиіс», – деп атап өтті. «Бұл міндет біздің алдымызға үлкен жауапкершілік жүктейді», – деді облыс әкімі Марат Сұлтанғазиев.

Марат Сұлтанғазиев, облыс әкімі:

- Биылғы жылдың 9 айының қорытындысы бойынша ақпарат және байланыс секторы 12 процентке өсім көрсетіп, өнім көлемі 13,7 млрд теңгеге жетті. Смарт-сити көрсеткіші де айтарлықтай жақсарып, 2024 жылдың қорытындысы бойынша 70 баллды құрады. Алдыңғы жылға қарағанда екі есе артты.

Алматы облысындағы 368 елді мекеннің 349-ы кең жолақты интернетпен қамтылды. Тұрғындардың ғаламторға қолжетімділігі 99,9%-ке жетті. 261 ауылға талшықшы-оптикалық байланыс жүйесі тартылып, 311 ауылда 4G желісі тұрақты жұмыс істеп тұр.

Жәнібек Қаратаев, Алатау қаласы әкімі аппаратының басшысы:

- Алатау қаласының Жетіген ықшам ауданында 5G форматындағы байланыс іске қосылды. Бүгінгі марапатым алған Алматы облысы әкімінің құрмет грамотасы сала бойынша және әрі қарай осы саланы дамытуға енді үлкен мотивация береді. Жұмысымызды бағалап жатқанына көп-көп рахмет айтқым келеді.

«Алматы облысының цифрлық көшірмесі» жобасы аясында 33 елді мекеннің цифрлық картасы жасалып, 2000 шақырымнан астам инженерлік желі тартылды. Облыс аумағындағы елді мекендерге 9 мыңнан астам интеллектуалды бейнебақылау жүйесі орнатылды. Ал облыс орталығы Қонаевта жасанды интеллект саласындағы алғашқы бастама - Qonaev AI жүйесі іске қосылды.

Авторлары: Ардақ Айбарұлы, Аят Дүйсенбаев, Аманжол Жөңкешов