Almaty Superski тау курорты жобасы ауқымды қоғамдық және ғылыми сараптамадан өтуде

Almaty Superski тау курортын салу жобасы «Іле-Алатауы» мемлекеттік ұлттық табиғи паркінің жанындағы Үйлестіру кеңесінің қарауына шығарылды.
Жоба бастамашысы - Kazakh Tourism Development компаниясы инфрақұрылымдық нысанды іске асыруға бақылау жүйесін ең алғашқы кезеңдерден бастап қалыптастырып, талқылау процесіне ғылыми және азаматтық қоғам өкілдерін қосты.

Ақылдастар құрамына беделді ғалымдар, тәуелсіз сарапшылар, спортшылар мен қоғам қайраткерлері енді. Кеңес мүшелерінің айтуынша, мұндай формат құрылыс жұмыстарының белсенді кезеңі басталғанға дейін курорт параметрлерін жан-жақты зерттеуге мүмкіндік береді.

«Біз бұл кеңесті қаламыз үшін аса маңызды жобалардың бірі қалай жүзеге асырылатынын бірге талқылап, түсіну үшін құрдық. Біз - алматылықпыз, тауларымызды жақсы көреміз және бұл мәселеден тыс қалуға құқығымыз жоқ. Мұнда, үйлестіру кеңесінде, ғалымдар мен ғылыми институттардың өкілдері, спортшылар, шаңғышылар, қоғам қайраткерлері жиналды. Әрқайсымыз не және қалай салынатынын, сондай-ақ қандай көмек көрсете алатынымызды түсінгіміз келеді. Ең бастысы - Almaty Superski шын мәнінде халықтық жобаға айналуы тиіс», - деді Үйлестіру кеңесінің төрағасы Мұхтар Тайжан.

Отырыс барысында Kazakh Tourism Development басшысы Ержан Еркінбаев ерекше қорғалатын табиғи аумаққа қойылатын қатаң талаптарды ескере отырып, нысандар орналасатын аумақтың тұжырымдамасын таныстырды. Қатысушыларға жоспарланған тау шаңғысы трассаларының, аспалы жолдардың және инженерлік желілердің тізімі, сондай-ақ Алматы үшін күтілетін әлеуметтік-экономикалық тиімділік туралы мәліметтер ұсынылды.
Экологиялық қауіпсіздік мәселелеріне ерекше назар аударылды. Соның ішінде сирек кездесетін өсімдік түрлерін сақтау үшін аумақты кешенді зерттеу қарастырылған. Жоба Қоршаған ортаға әсерді бағалау (ҚОӘБ) материалдарын міндетті түрде әзірлеуді, кейін қоғамдық тыңдаулар өткізуді және мемлекеттік экологиялық сараптамадан өтуді көздейді.

«Біз үшін Almaty Superski бойынша әрбір шешімнің жабық есік жағдайында емес, қоғаммен ашық диалог аясында қабылдануы аса маңызды. Біз ынтымақтастыққа дайынбыз және ғылым өкілдерінің ұсыныстарына мұқият құлақ асамыз, - деді Kazakh Tourism Development басшысы Ержан Еркінбаев. - Біздің міндет - жай ғана курорт салу емес. Біздің міндет - балаларымызға біз бүгін, мысалы, Медеуді мақтан тұтқандай, мақтанышпен қарайтын таулар мен инфрақұрылымды қалдыру».

Жоба сараптамасына қазірдің өзінде профильдік академиялық мамандар пулы тартылған. Олардың қатарында Зоология институтының, Топырақтану институтының, Археология институтының басшылығы және әл-Фараби атындағы ҚазҰУ-дың биология факультетінің сарапшылары бар. Ғылыми қауымдастық Almaty Superski жобасын қолдай отырып, қатаң талап қойып отыр: жоба табиғатты қорғау заңнамасын мүлтіксіз сақтаған жағдайда және тау экожүйелеріне түсетін әсерді барынша азайту үшін тұрақты ғылыми сүйемелдеумен ғана іске асырылуы тиіс. Ашық талқылау форматын альпинистер мен тау туризмін сүйетін спорт қауымдастығы өкілдері де қолдады. Мұндай келісу моделі жобаны дәстүрлі инвестициялық бастамалардан ерекшелендіріп, курорттың мегаполистің «үстінен» емес, қаламен тығыз серіктестік аясында инфрақұрылымға интеграцияланатынын көрсетеді.