Алматы тауларынан табылған адам сүйектерінің кімге тиесілі екені белгілі болды

Алматы облысының тауларынан табылған адам сүйектерінің кімге тиесілі екені белгілі болды, деп хабарлайды Tengrinews.kz.

Алматы тұрғыны Нелля Михеева Instagram парақшасында видеолар сериясын жариялап, тауда табылған мәйіт қалдықтары әкесіне тиесілі екенін айтты. Болжам бойынша, ол 2007 жылы тауға кетіп, содан қайтып оралмаған.

"Бүгін біздің отбасымыз үшін бір жағынан қайғылы, екінші жағынан қуанышты күн. 19 жылдан кейін әкемнің сүйектері табылды. Северцов мұздығы еріп кетіпті. Беларусьтен келген туристерге бейжай қарамай, әкемнің сүйектері мен рюкзагін тауып алғаны үшін рақмет", деді алматылық әйел.

Әйелдің айтуынша, құрбысы оған таудан табылған адам сүйектері туралы жазбаның суретін жіберген. Ол әкесінің рюкзагін бірден таныған, кейінірек осыған ұқсас жазбаны жолдасы да жіберіпті.

"Бұл расымен де әкемнің рюкзагі. Өйткені бұл ескі кеңестік станокты рюкзак. 2007 жылы тағы біреудің дәл осындай рюкзакпен тауға шығу ықтималдығы өте төмен", - деді қазақстандық әйел.

Нелля таудан мәйіт пен заттарды алып түскен құтқарушылармен, кейін полициямен байланысқа шыққан.

"Құтқарушылар тергеушінің нөмірін берді, біз сөйлестік. Тергеуші қолда бар барлық құжаттарды жіберуді сұрады. Мен барлық құжаттарды, тауда жүргендегі рюкзакпен түскен суреттерді жібердім. Кейінірек ол қайта хабарласып, рюкзактің ішінен әкемнің куәлігі табылғанын айтты", - деді ол.

Күні кеше әлеуметтік желілерде Беларусьтен келген туристердің Алматы облысының тауларынан адам сүйектерін тапқаны туралы жазба пайда болды.

Жазба авторының айтуынша, оның достары екі апта бойы тауда болған, ал төмен түсу кезінде адам мәйітінің қалдықтарын тапқан.

Фото: facebook.com/akhmetova.kz

Туристер бірден құтқарушылармен байланысқа шыққан. Олар өз кезегінде оқиға орнына ТЖМ "Қазавиақұтқару" әуе кемесімен "Барыс" республикалық жедел-құтқару жасағының мамандары мен ТЖМ Апаттар медицинасы орталығының қызметкерлерін жіберді.

19 тамыз күні кешке ТЖМ құтқарушылар Алматы облысының тауларында қаза тапқан туристің мәйітін эвакуациялағанын хабарлады.

Эвакуациядан кейін мәйіт қаза тапқан адамның кім екенін анықтау және оқиғаның мән-жайын анықтау үшін Алматы облысының жедел-тергеу тобының қызметкерлеріне тапсырылды.

Google News арқылы жаңалықтарымызды қадағалаңыз