Алматы тауларында жоғалған бес жасөспірім құтқарылды

Алматы тауларында жоғалып кеткен бес жасөспірім құтқарушылардың жедел әрекетінің арқасында аман-есен табылды, – деп хабарлайды Aikyn.kz сайты.

«112» пультіне түскен хабарға сәйкес, 2009 жылы туған жасөспірімдер Күмбел шыңына көтеріліп, кейін «Үш ағайынды» маңына (шамамен 3000 метр) түскеннен кейін кері қайтпаған. Олармен байланыс үзілген. Өтініш беруші – олардың бірінің әкесі – баласының демікпе ауруы бар екенін айтып, дереу көмек сұраған.

Іздестіру жұмыстарына Алматы қалалық ТЖД Құтқару қызметі, «Барыс» республикалық құтқару жасағы және ТЖМ Апаттар медицинасы орталығының дәрігерлері жұмылдырылды.

Құтқарушылар бір сағат ішінде жасөспірімдер тобын тапты. Ара қашықтық шамамен 1,5 шақырым болған. Топтағы бір жасөспірімнің жағдайы нашарлап, бронхиалдық демікпе ұстамасы басталған. Ол қарда жүретін техника арқылы эвакуацияланып, медицина қызметкерлеріне тапсырылды.

Қалған төрт жасөспірім құтқарушылардың сүйемелдеуімен жаяу Көкжайлау шатқалына жеткізілді, содан кейін қалаға түсті.

Апаттар медицинасы орталығының дәрігерлері зардап шеккен жасөспірімге реанимобильде алғашқы медициналық көмек көрсетіп, ингаляция жасап, кейін үйіне жеткізді.

Құтқарушылардың үйлесімді әрі жылдам әрекеті арқасында барлық жасөспірімнің өмірі мен денсаулығына қауіп төнбеді.