Алматыда 2027 жылдан бастап ағаштар жаңа ережелер бойынша кесіледі

2027 жылдан бастап Алматыда апатты ағаштарды кесу жаңа ережелер бойынша жүргізіле бастайды. Қалалық экология басқармасы Tengrinews.kz тілшісіне қандай өзгерістер болатынын айтып берді.

2027 жылдан бастап не өзгереді?

Ведомствоның мәліметінше, 2027 жылдан бастап қала апатты ағаштарды кесудің жаңа жүйесіне көшеді. Басқарма 2018-2019 жылдардағы инвентаризация деректерінің орнына жаңа тексеру нәтижелерін және жаңартылған Жасыл желектер тізілімін пайдаланатын болады.

"Ағаштардың құлау оқиғаларының жиілеуіне байланысты 2022 жылдан бастап басқарма апатты жасыл желектерді кезең-кезеңімен кесудің бес жылдық жоспарын жүзеге асырып жатыр. 2027 жылдан бастап жұмыстар жаңа инвентаризация нәтижелері мен өзектендірілген Жасыл желектер тізілімі негізінде жүргізіледі", – деп хабарлады басқарма.

Анықтама: 2018-2019 жылдардағы қолданыстағы Жасыл желектер тізіліміне сәйкес, Алматыда 4,3 миллионнан астам жасыл желек бар. Оның ішінде 84 мыңға жуығы апатты деп танылған: шамамен 35 мыңы көше бойында, тағы 49 мыңы аула ішінде өсіп тұр.

Басқарма ағаштардың қайсысы апатты санатқа жататынын және кесілуге тиіс екенін түсіндірді.

"Өміршеңдігін толық жоғалтқан немесе діңі, тамыр жүйесі немесе бөрікбасы (кронасы) қатты зақымдалған, сондай-ақ азаматтардың өмірі мен денсаулығына, жылжымайтын мүлік нысандарына, инженерлік коммуникациялар мен көлік инфрақұрылымына қауіп төндіретін ағаштар апатты деп танылады", – деп атап өтті ведомство өкілдері.

Мамандар апаттылық деңгейін визуалды тексеру және аспаптық диагностикадан кейін анықтайды. Кейде бағалау жұмыстарына ғылыми ұйымдардың сарапшылары, соның ішінде Қазақ ұлттық аграрлық зерттеу университеті мен Бас ботаникалық бақтың мамандары тартылады.

Фото © Tengrinews.kz

Басқарманың хабарлауынша, 2025 жылдан бастап ведомство ҚазҰАЗУ-мен бірлесіп жасыл желектерді инвентаризациялаудан өткізеді. Мамандар ағаштардың санын, жасын, жай-күйін, аурулар мен зиянкестердің бар-жоғын тексеріп, сондай-ақ олардың ықтимал апаттылығын бағалайды.

Сонымен қатар әрбір ағаш үшін географиялық белгісі мен күтіп-баптау тарихы көрсетілген цифрлық карта жасалады.

Басқарма мамандардың заманауи диагностикалық жабдықтар мен дрондарды пайдаланатынын айтты. Бұл ағаштардың жасырын зақымдануларын анықтауға және олардың күйін дәлірек бағалауға мүмкіндік береді.

Жұмыстар аяқталғаннан кейін билік электронды Жасыл желектер тізілімін жаңартып, Алматының 2030 жылға дейінгі ұзақ мерзімді дендрологиялық жоспарын әзірлейді.

"Жүргізілген жұмыс нәтижелері бойынша санитарлық және пішіндеп кесу, емдеу, жасарту және жасыл қорды қалпына келтіру бойынша басым іс-шаралар айқындалады. Сондай-ақ алғаш рет Алматы қаласының 2030 жылға дейінгі ұзақ мерзімді дендрологиялық жоспары әзірленеді, ол көгалдандыру жүйесін ғылыми негізделген түрде дамытудың негізіне айналады", – деп хабарлады басқарма.

Сондай-ақ ведомство қолданыстағы тізілім қазірдің өзінде Eco Almaty сайтында және "РЗН" мобильді қосымшасында ашық қолжетімді екенін еске салды.

Google News арқылы жаңалықтарымызды қадағалаңыз