Алматыда 2040 жылға дейін су инфрақұрылымы кезең кезеңімен жаңғыртылады

Алматыда 2040 жылға дейін сумен жабдықтау жүйесін кешенді жаңғырту жоспарланып отыр.
Бұл туралы қаланың Бас жоспарына стратегиялық экологиялық бағалау аясында өзгерістер енгізуге арналған қоғамдық тыңдаулар барысында мәлім болды.

Талқылаудың басты бағыттарының бірі – халық санының артуы мен тұрғын үй құрылысының қарқынды дамуын ескере отырып, қаланың сумен жабдықтау жүйесін жетілдіру. Жоспарға сәйкес, инфрақұрылымды жаңарту жұмыстары бірнеше кезеңмен жүзеге асырылады.

Жоба аясында жаңа су тарту нысандары мен сүзгі станцияларын салу, қолданыстағы су көздерінің қуатын арттыру және инженерлік желілерді кезең-кезеңімен жаңғырту көзделген.

Ауыз сумен қамтамасыз ету мәселесін шешуде Наурызбай ауданы мен Бостандық ауданының жекелеген аумақтарына басымдық беріледі. Бұл тұрғындарды сапалы ауыз сумен тұрақты қамтамасыз етуге мүмкіндік береді.

Сонымен қатар, жоспарда су шаруашылығы саласын цифрландыру, су ресурстарын тиімді пайдалану және экологиялық тұрғыдан тұрақты инфрақұрылымды дамыту шаралары қамтылған. Сондай-ақ электр көлігіне арналған инфрақұрылымды кеңейту мәселесі де Бас жоспарға енгізілген.

Мамандардың айтуынша, аталған шаралар Алматының инженерлік инфрақұрылымының сенімділігін арттырып, қала тұрғындарының сапалы коммуналдық қызметтерге қолжетімділігін жақсартуға бағытталған.