Алматыда 400 орындық жаңа студенттер жатақханасы салынады

Фото: istockphoto.com

Жалпы ауданы 3 537,2 шаршы метр болатын жаңа жатақхана 400 орынға есептелген. Ғимарат төрт қабаттан және жертөледен тұрады.

Жобаның жалпы құны 750 млн теңгені құрайды. Оның 250 млн теңгесі – инвестор «BAZA 271» ЖШС-нің қаражаты болса, 500 млн теңгесі – «Almaty Finance» ЖШС тарапыннан мердігерге қарызға берілмек.

«Жоба Алматының білім беру инфрақұрылымын дамытуға, студенттерді заманауи әрі жайлы тұрғын үймен қамтамасыз етуге және студенттік жатақханалардағы орын тапшылығын азайтуға бағытталған», делінген әкімдік хабарламасында.

Сондай-ақ нысан құрылысы Ғылым және жоғары білім министрлігінің «Қаржы орталығы» АҚ арқылы мемлекеттік субсидиялау тетігімен жүзеге асырылады. Субсидия мөлшері – жатақханада тұратын әрбір студентке 230 АЕК болып белгіленген.

5176 студентке орын жетпейді: Алматыда жатақхана мәселесі қашан толық шешіледі?

Ал жатақханада тұру ақысы бір студент үшін айына 45 мың теңге болмақ.

Еске сала кетейік, бұған дейін Мәжілістің жалпы отырысында Respublica партиясы фракциясының мүшесі Нұргүл Тау елімізде 33 мың жас жатын орын таппақ жүргенін айтқан болатын. Студенттерді жатақханамен қамтамасыз ету өңірлік даму мен еңбек нарығы үшін де маңызды екендігін атап өткен Нұргүл Тау бірыңғай ұлттық цифрлық платформа енгізуді ұсынған еді.