Алматыда аулалардағы шлагбаумдар бойынша шешім қабылданды

Алматыда аулаға шлагбаум орнатудың бірыңғай ережесін енгізу жоспарланып отыр. Енді бұл үшін аудандық әкімдіктің келісімі қажет болады, ал шлагбаум қауіпсіздік талаптарына сай келуі тиіс, деп хабарлайды Tengri Auto.

Қалалық мобильділік басқармасының басшысы Ержан Диханбаев мәслихат отырысында шлагбаумды аудандық әкімдіктің рұқсатын алғаннан кейін ғана орнатуға болатынын түсіндірді.

Оның айтуынша, кейбір жағдайда, атап айтқанда өтпелі аулалар туралы сөз болғанда, мәселені қарауға өртке қарсы қызмет мамандары тартылуы мүмкін. Түпкілікті шешімді аудандық әкімдік қабылдайды.

Тағы бір міндетті талап шұғыл қызметтердің өтуіне қатысты. Шлагбаум жедел жәрдем, өрт сөндіру қызметі, полиция және өзге де арнайы техникалардың қозғалысына кедергі келтірмеуі тиіс.

Бұл үшін екі нұсқа қарастырылған. Біріншісі - арнайы дыбыстық сигналдарды таныған кезде шлагбаумның автоматты түрде ашылуы. Екіншісі - қашықтан басқару, яғни жауапты адам батырманы басу арқылы жолды аша алады.

"Шұғыл қызметтердің кедергісіз өтуін қамтамасыз етудің екі жолы бар. Біріншісі - жедел жәрдем, өрт сөндіру қызметі мен полиция көліктерінің дыбыстық сигналдарын автоматты түрде танитын шлагбаум. Екіншісі - қашықтан қол жеткізу, бұл жағдайда жауапты адам батырманы басу арқылы шлагбаумды аша алады", - деп түсіндірді Ержан Диханбаев.

Талқылау барысында депутат Асқар Бисқұлтанов бұрын орнатылған шлагбаумдар мәселесін де қозғады.

Басқарма мұндай құрылымдардың иелеріне де келісу рәсімінен қайта өтуге және қажет болған жағдайда оларды жаңа талаптарға сай қосымша жабдықтауға тура келетінін растады.

Сонымен қатар шлагбаум орнату үшін тұрғындар жалпы жиналыс өткізуі қажет. Егер бастаманы меншік иелерінің 60 пайыздан астамы қолдап дауыс берсе, аудандық әкімдікке өтінім беруге болады.

Жобаны әзірлеушілердің пікірінше, жаңа ережелер шлагбаумдарды орнатуды ретке келтіруге, арнайы қызметтердің кедергісіз өтуін қамтамасыз етуге және бұл процесті тұрғындар үшін түсінікті етуге көмектеседі.

Еске сала кетейік, 12 сәуірге қараған түні Астанадағы "Көркем-3" тұрғын үй кешенінде өрт шыққан болатын. Аула көлікке толып, кіреберіс темір қақпамен жабылған. Бұл туралы Астана ТЖД хабарлады.

Өрт салдарынан пәтерлердің бірінде үш бала қаза тапты, олардың анасы аман қалып, ауыр жағдайда жансақтау бөліміне түсті.

Айта кетейік, маусымда Алматыда полиция ТЖД-мен бірлесіп рейд өткізген болатын. Рейд барысында тұрғын үй кешендері аулаларынан дұрыс қойылмаған көліктер жаппай эвакуацияланды, өйткені олар арнайы қызметтердің өтуіне қиындық тудыруы мүмкін.

Бұған дейін алматылықтарға үй маңайындағы тұрақтарға көлікті тегін қоюға рұқсат берілгені хабарланған болатын.

Тағы оқыңыз: Алматыда “шашылып жататын“ самокаттар: жаңа ережедегі шектеулер белгілі болды

Google News арқылы жаңалықтарымызды қадағалаңыз